റോത്തക്ക്: 63ാമത് ദേശീയ സീനിയര്‍ സ്‌കൂള്‍ അത്‌ലറ്റിക് മീറ്റില്‍ കേരളം ചാംപ്യന്‍മാരായി. 86 പോയിന്റുമായിട്ടാണ് ഹരിയാനയെ പിന്തള്ളിയാണ് കേരളം ഒന്നാമതെത്തിയത്. 9 സ്വര്‍ണം,9 വെള്ളിയും 6 വെങ്കലവുമുള്‍പ്പെടെ 24 മെഡലാണ് കേരളത്തിന്റെ സമ്പാദ്യം. രണ്ടാം സ്ഥാനത്ത് ആതിഥേയരായ ഹരിയാനയും മൂന്നാംസ്ഥാനത്ത് തമിഴ്‌നാടുമാണ് ഉള്ളത്. തുടര്‍ച്ചയായ 20-ാം തവണയാണ് കേരളത്തിന്റെ കിരീട നേട്ടം.

ആദ്യ രണ്ടു ദിനവും മുന്നിട്ടുനിന്ന ഹരിയാനയെ കേരളം മറികടക്കുകയായിരുന്നു. നാലാം ദിനത്തിലെ ഉജ്ജ്വല മുന്നേറ്റമാണ് കേരളത്തെ കിരീടം നിലനിര്‍ത്താന്‍ സഹായിച്ചത്.

മൂന്നാം ദിനത്തിലെ മത്സരങ്ങള്‍ കഴിയുമ്പോള്‍ ഹരിയാന ഒന്നാമതും കേരളം രണ്ടാം സ്ഥാനത്തുമായിരുന്നു. നാലാം ദിനം നടന്ന ഒമ്പതു ഫൈനലുകളില്‍ നിന്നു കേരളം നേടിയത് മൂന്നു വീതം സ്വര്‍ണവും വെള്ളിയും, രണ്ടു വെങ്കലവുമാണ്. ഇതാടെ ഹരിയാനയെ പിന്തള്ളി കേരളം ഒന്നാം സ്ഥാനത്തേക്കു കയറി. 

ഇന്നലെ നടന്ന ഒന്‍പത് ഫൈനലുകളില്‍ ജാവലില്‍ ത്രോയിലും ഷോട് പുട്ടിലും മാത്രമാണ് കേരളത്തിന് മെഡല്‍ നേടാനാവാതെ പോയത്. ദേശീയ സ്‌കൂള്‍ മീറ്റ് ചരിത്രത്തിലാദ്യമായി ആണ്‍കുട്ടികളുടെ ഡിസ്‌കസ് ത്രോയില്‍ കേരളം സ്വര്‍ണം നേടിയതും ഇന്നലെ നേട്ടമായി. ആണ്‍കുട്ടികളുടെ ഡിസ്‌കസ് ത്രോയില്‍ അലക്‌സ് പി തങ്കച്ചനാണ് സ്വര്‍ണ നേട്ടത്തിലൂടെ ചരിത്രം തിരുത്തിയത്.