തിരുവന്തപുരം: സംസ്ഥാനത്തെ മെഡിക്കല്‍ കോളേജുകളിലെ പി.ജി ഡോക്ടര്‍മാരും ഹൗസ് സര്‍ജന്‍മാരും നാളെ മുതല്‍ തുടങ്ങാനിരുന്ന അനിശ്ചിതകാല പണിമുടക്ക് സമരം പിന്‍വലിച്ചു. ആരോഗ്യ മന്ത്രിയുമായി നടത്തിയ ചര്‍ച്ചയെ തുടര്‍ന്നാണ് തീരുമാനം.

ഡോക്ടര്‍മാരുടെ പെന്‍ഷന്‍ പ്രായവര്‍ധനയ്‌ക്കെതിരെയായിരുന്നു സംസ്ഥാനത്തെ സര്‍ക്കാര്‍ മെഡിക്കല്‍ കോളജുകളിലെ പിജി ഡോക്ടര്‍മാരും ഹൗസ് സര്‍ജന്‍മാരും സമരത്തിനൊരുങ്ങിയത്. ലെക്ചര്‍ നിയമനത്തിലടക്കം സംയുക്ത സമരസമിതി ഉന്നയിച്ച ആശങ്കകള്‍ പരിഗണിക്കാമെന്ന ആരോഗ്യവകുപ്പിന്റെ ഉറപ്പിലാണ് സമരം പിന്‍വലിച്ചത്.

അതേസമയം സര്‍ക്കാര്‍ ഡോക്ടര്‍ മാരുടെ പെന്‍ഷന്‍ പ്രായ വര്‍ധനയില്‍ നിന്ന് പിന്നോട്ടു പോകാനാകില്ലെന്ന നിലപാടില്‍ സര്‍ക്കാര്‍ ഉറച്ചു നിന്നു.