അന്തിക്കാട്: ചൂരക്കോട് ശ്രീ ദുര്‍ഗ്ഗാഭഗവതി ക്ഷേത്രത്തിലെ രാമായണ മാസാചരണ സമാപനവും ആനയൂട്ടും നടന്നു. രാവിലെ നടന്ന വിശേഷാല്‍ പൂജകള്‍ക്ക് ശേഷം ക്ഷേത്രം മേല്‍ശാന്തി പാദൂര്‍മഠം രാമചന്ദ്രന്‍ എമ്പ്രാന്തിരിയുടെ നേതൃത്വത്തില്‍ ഗജപൂജാ ചടങ്ങുകള്‍ നിര്‍വഹിച്ചു. തുടര്‍ന്ന് കൊച്ചിന്‍ ദേവസ്വം ബോര്‍ഡ് സ്‌പെഷല്‍ കമ്മിഷണര്‍ കെ.ആര്‍ ഹരിദാസ് വെള്ളരി നല്‍കി കൊണ്ട് ആനയൂട്ടിന് തുടക്കം കുറിച്ചു.
തുടര്‍ന്ന് ഭക്തരും ആനയൂട്ടില്‍ പങ്കാളികളായി. രാമായണ മാസാചരണത്തിന്റെ ഭാഗമായി വിദ്യാര്‍ഥികള്‍ക്കായി നടത്തിയ രാമായണ ക്വിസ് മത്സരത്തിന്റയും ക്ഷേത്രത്തില്‍ സ്ഥാപിച്ച ലൈറ്റ് നെയിംബോഡിന്റെ സ്വിച്ച് ഓണ്‍ കര്‍മ്മവും പ്രസാദ ഊട്ടിന്റെയും ആദ്യ വിളമ്പല്‍ ചടങ്ങും കമ്മിഷണര്‍ നിര്‍വഹിച്ചു. ചടങ്ങില്‍ കൊച്ചിന്‍ ദേവസ്വം ബോര്‍ഡ് സെക്രട്ടറി വി.എ ഷീജ, ദേവസ്വം ഓഫിസര്‍ അനില്‍ ആറാട്ടുപുഴ, ക്ഷേത്ര സംരക്ഷണ സമിതി ഭാരവാഹികള്‍ എന്നിവര്‍ പങ്കെടുത്തു.