മാഡ്രിഡ്: ലോകം കാത്തിരുന്ന റയല്‍ മാഡ്രിഡ്- ബാഴ്‌സലോണ എല്‍ ക്ലാസിക്കോ ഇന്ന് അരങ്ങേറും. സീസണിലെ ആദ്യ എല്‍ ക്ലാസിക്കോ റയലിന്റെ തട്ടകമായ സാന്റിയാഗോ ബെര്‍ണാബുവിലാണ് നടക്കുന്നത്. ഇന്ത്യന്‍ സമയം വൈകിട്ട് 5.30നാണ് പോരാട്ടം. ദിവസങ്ങള്‍ക്ക് മുന്‍പ് ബാല്ലണ്‍ ഡി ഓര്‍ പുരസ്‌കാരം അഞ്ചാം വട്ടവും സ്വന്തമാക്കി ബാഴ്‌സലോണ സൂപ്പര്‍ താരം ലയണല്‍ മെസ്സിയുടെ റെക്കോര്‍ഡിനൊപ്പമെത്തിയ ശേഷം ക്രിസ്റ്റ്യാനോ റൊണാള്‍ഡോയും മെസ്സിയും ആദ്യമായി നേര്‍ക്കുനേര്‍ വരുന്ന മത്സരമെന്ന പ്രത്യേകതയുമുണ്ട്. ബാല്ലണ്‍ ഡി ഓര്‍ സ്വീകരിച്ച ശേഷം ക്രിസ്റ്റ്യാനോ, ചരിത്രത്തിലെ ഏറ്റവും മികച്ച താരമായി സ്വയം വിശേഷിപ്പിച്ചിരുന്നു. ഇന്നത്തെ പോരാട്ടം അതുകൊണ്ട് തന്നെ ശ്രദ്ധേയം. സീസണില്‍ ലാ ലിഗയില്‍ പരാജയമറിയാതെ ഒന്നാം സ്ഥാനത്ത് കുതിക്കുന്ന ബാഴ്‌സലോണയെ സ്വന്തം തട്ടകത്തില്‍ പിടിച്ചുകെട്ടാമെന്ന കണക്കുകൂട്ടലിലാണ് റയല്‍.
എല്ലാ പോരാട്ടങ്ങളിലുമായി ഇരു ടീമുകളും നേര്‍ക്കുനേര്‍ വന്നത് ഇതുവരെ 269 മത്സരങ്ങളില്‍. 111 വിജയവുമായി ബാഴ്‌സലോണ മുന്നില്‍ നില്‍ക്കുന്നു. 99 വിജയങ്ങളുമായി റയലും. അതേസമയം ലാ ലിഗയില്‍ മാത്രം ഇതുവരെ 174 മത്സരങ്ങളിലാണ് ഇരു ടീമുകളും തമ്മില്‍ ഏറ്റുമുട്ടിയത്. 72 വിജയവുമായി റയല്‍ മുന്നില്‍. ബാഴ്‌സയ്ക്ക് 69 വിജയങ്ങളാണുള്ളത്. എല്ലാ ടൂര്‍ണമെന്റിലുമായി 59 മത്സരങ്ങള്‍ സമനിലയില്‍ പിരിഞ്ഞു. ലാ ലിഗയില്‍ മാത്രം 33 മത്സരങ്ങളാണ് ഒപ്പത്തിനൊപ്പം നിന്നത്.