ജയ്പുര്‍: രാജസ്ഥാനിലെ സവായ് മധോപുരിനു ബസ് നദിയിലേക്ക് മറിഞ്ഞുണ്ടായ അപകടത്തില്‍ മരിച്ചവരുടെ എണ്ണം 32 ആയി. ഇന്ന് രാവിലെയുണ്ടായ അപകടത്തില്‍ പത്തോളം പേര്‍ക്ക് പരുക്കേല്‍ക്കുകയും ചെയ്തിരുന്നു.

50 യാത്രക്കാരുമായി രാജസ്ഥാനിലെ ലാല്‍സോതില്‍ നിന്ന് സവായ് മധോപൂരിലേക്ക് പോയ ബസ് നിയന്ത്രണം നഷ്ടപ്പെട്ട് ദുബി പാലത്തില്‍ നിന്ന് നദിയിലേക്ക് മറിയുകയായിരുന്നു. പരുക്കേറ്റവരെ സമീപത്തെ ആശുപത്രിയിലേക്ക് മാറ്റി.

മലാന ദാബിയിലെ തീര്‍ഥാടന കേന്ദ്രത്തിലേക്കു പോയ യാത്രികരാണ് അപകടത്തില്‍പ്പെട്ടവരിലേറെയും. പ്രായപൂര്‍ത്തിയാകാത്ത ബസ് കണ്ടക്ടറാണ് അപകടസമയത്ത് ബസ് ഓടിച്ചിരുന്നതെന്ന് ആരോപണമുണ്ട്.

യാത്രക്കാരില്‍ ചിലരെ നദിയില്‍ കാണാതായെന്ന റിപ്പോര്‍ട്ടിനെ തുടര്‍ന്ന് രക്ഷാപ്രവര്‍ത്തനം ഊര്‍ജിതമാക്കി.

പ്രധാനമന്ത്രി നരേന്ദ്രമോദി, കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി എന്നിവര്‍ അപകടത്തില്‍ ദുഖം രേഖപ്പെടുത്തി.