കുണ്ടാല: കുണ്ടാല മുനീറുല്‍ ഇസ്‌ലാം മഹല്ല് മാനേജിങ് കമ്മിറ്റിയുടെ നേതൃത്വത്തില്‍ 'സ്വദേശി ദര്‍സ്' ആരംഭിച്ചു. ദര്‍സിന്റെ ഉദ്ഘാടനവും മജ്‌ലിസുന്നൂര്‍ സദസും സയ്യിദ് സാബിത്ത് റഹ്മാനി പള്ളിക്കല്‍ ഉദ്ഘാടനം ചെയ്തു. മഹല്ല് ഖതീബ് നാസര്‍ ഫൈസി അധ്യക്ഷനായി.
മഹല്ല് പ്രസിഡന്റ് ടി അബ്ദുല്ല, മഹല്ല് ചെയര്‍മാന്‍ കെ.കെ അബ്ദുല്ല ഫൈസി, സദര്‍ മുഅല്ലിം സമദ് ദാരിമി, അബ്ദുല്ല മൗലവി, തെറ്റന്‍ ഉസ്മാന്‍, എം മൂസ, ഹബീബുല്ല മൗലവി സംസാരിച്ചു. മഹല്ല് ജനറല്‍ സെക്രട്ടറി ഇ. ഇബ്രാഹിം സ്വാഗതവും മേക്കായി നാസര്‍ നന്ദിയും പറഞ്ഞു. കേരളത്തിലെ ഇസ്‌ലാമിക പ്രസ്ഥാനത്തിന് ശക്തിപ്പെടുത്തിയിരുന്നത് സംസ്ഥാനത്തെ വിവിധ പള്ളികള്‍ക്ക് കീഴില്‍ നടന്നിരുന്ന ദര്‍സുകളാണ്. പൊന്നാനി മഖ്ദൂം കുടുംബം പള്ളി ദര്‍സിലൂടെ സമൂഹത്തിന് പകര്‍ന്ന് നല്‍കിയതാണ് ഇന്നു കാണുന്ന ഇസ്‌ലാമിക ബോധം. എന്നാല്‍ ആധുനിക കാലഘട്ടത്തില്‍ ഇത്തരം പള്ളി ദര്‍സുകള്‍ അന്യം നിന്നു പോകുകയാണ്.
ഇത് സമൂഹത്തിലെ ഇസ്‌ലാമിക കാഴ്ചപ്പാടുകള്‍ക്കും കോട്ടം സംഭവിപ്പിക്കുന്നുണ്ട്. ഇക്കാരണത്താല്‍ പൂര്‍വികര്‍ തുടര്‍ന്ന് കൊണ്ടു പോന്നിരുന്ന പള്ളി ദര്‍സുകള്‍ തിരികെയെത്തിച്ച് മഹല്ലുകളില്‍ ദീനി പണ്ഡിതരെ വാര്‍ത്തെടുക്കുകയെന്ന ലക്ഷ്യത്തോടെ സുന്നി മഹല്ല് ഫെഡറേഷന്റെ സംസ്ഥാന കമ്മിറ്റി ആവിഷ്‌കരിച്ചതാണ് സ്വദേശി ദര്‍സ്. ഇത്തരത്തില്‍ ജില്ലയില്‍ ആരംഭിച്ച ആദ്യ ദര്‍സുകളിലൊന്നാണ് കുണ്ടാല മുനീറുല്‍ ഇസ്‌ലാം മഹല്ല് മാനേജിംഗ് കമ്മിറ്റിയുടെ നേതൃത്വത്തിലുള്ളത്.