തിരുവനന്തപുരം: സാംസ്‌കാരിക വകുപ്പിന് കീഴില്‍ കൊണ്ടോട്ടിയില്‍ പ്രവര്‍ത്തിക്കുന്ന മഹാകവി മോയിന്‍കുട്ടി വൈദ്യര്‍ മാപ്പിള കലാ അക്കാദമിയുടെ വാര്‍ഷിക പരിപാടിയായ വൈദ്യര്‍ മഹോത്സവത്തിന് ഇന്ന് തുടക്കമാവും. തിരുവനന്തപുരം വെള്ളയമ്പലത്തെ മാനവീയം വീഥിയില്‍ പരിപാടി മുന്‍ സാംസ്‌കാരിക മന്ത്രി എം.എ ബേബി ഉദ്ഘാടനം ചെയ്യും.
മാനവീയം ഇശലിമ്പം എന്ന് പേരിട്ട പരിപാടിയില്‍ പ്രഭാഷണങ്ങള്‍, സെമിനാറുകള്‍, സംഗമങ്ങള്‍, മത്സരങ്ങള്‍, പുസ്തകപ്രകാശനം,വിവിധ കലാപ്രകടനങ്ങള്‍, ഗാനമേള തുടങ്ങിയവ സംഘടിപ്പിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
ഇന്ന് തിരുവനന്തപുരത്തും നാളെ കോട്ടയത്തെ ഈരാറ്റുപേട്ടയിലും 26ന് എറണാകുളത്തെ പെരുമ്പാവൂരും 27 മുതല്‍ 30വരെ കൊണ്ടോട്ടിയിലുമായാണ് വൈദ്യര്‍മഹോത്സവം നടക്കുന്നത്. 30ന് കൊണ്ടോട്ടിയില്‍ മന്ത്രി എ.കെ ബാലന്‍ ഉദ്ഘാടനം ചെയ്യും. വാര്‍ത്താ സമ്മേളനത്തില്‍ അക്കാദമി സെക്രട്ടറി റസാഖ് പയമ്പ്രോട്ട്, ഡി.രഘുത്തമന്‍, ഷൈലജ പി അംബു, വിനുവിക്രം, അജിത്ത് പങ്കെടുത്തു.