കണ്ണൂര്‍: സഹകരണ മേഖലയില്‍ കണ്ണൂരില്‍ ആരംഭിക്കുന്ന പലിശരഹിത ബാങ്കില്‍ ഏത് മതസ്ഥര്‍ക്കും അംഗത്വമെടുക്കാമെന്ന് സി.പി.എം. ഹലാല്‍ ഫായിദ കോപ്പറേറ്റിവ് സൊസൈറ്റിയില്‍ എല്ലാ മതവിഭാഗത്തിലുള്ളവര്‍ക്കും അംഗത്വമെടുക്കാമെന്ന് സി.പി.എം ജില്ലാ സെക്രട്ടറി പി. ജയരാജനാണ് ഫേസ്ബുക്ക് പോസ്റ്റിലൂടെ അറിയിച്ചത്.
കേരളത്തിലെ സഹകരണ പ്രസ്ഥാനം ഇന്ത്യയ്ക്ക് ഒട്ടേറെ മാതൃകകള്‍ സമ്മാനിച്ച ഒന്നാണ്. പലിശ നല്‍കുന്നതിനും വാങ്ങുന്നതിനും വിമുഖത ഉള്ളവര്‍ക്ക് നിക്ഷേപം നടത്താനും ലാഭകരമായ സംരംഭങ്ങള്‍ നടത്താനുമുള്ള വേദിയാണ് ഈ സഹകരണ സംഘമെന്നും പി. ജയരാജന്‍ ഫേസ്ബുക്ക് പോസ്റ്റില്‍ പറയുന്നു.
ന്യൂനപക്ഷങ്ങളെ ആകര്‍ഷിക്കാന്‍ ഇസ്‌ലാമിക ബാങ്ക് എന്ന ആശയത്തോട് ചേര്‍ന്നു നില്‍ക്കുന്ന പലിശരഹിത ബാങ്കിന് സി.പി.എം തുടക്കമിടുന്നത് വിവാദങ്ങള്‍ക്കിടയാക്കിയ സാഹചര്യത്തിലാണ് പാര്‍ട്ടി സെക്രട്ടറിയുടെ വിശദീകരണം. സൊസൈറ്റിയുടെ ഉദ്ഘാടനം ഇന്ന് മുഖ്യമന്ത്രി പിണറായി വിജയന്‍ നിര്‍വഹിക്കും.
കണ്ണൂരില്‍ ന്യൂനപക്ഷങ്ങളെ ആകര്‍ഷിക്കാന്‍ സി.പി.എം നിയന്ത്രണത്തിലുള്ള ന്യൂനപക്ഷ കോഡിനേഷന്‍ കമ്മിറ്റിയുടെ നേതൃത്വത്തില്‍ രൂപീകരിക്കുന്ന സൊസൈറ്റിയുടെ ആദ്യ സംരംഭം ബീഫ് കയറ്റുമതിയും വിപണനവും ആണെന്നതാണ് ഏറെ ശ്രദ്ധേയം. 20 കോടിയുടെ പദ്ധതിയാണ് സൊസൈറ്റി ലക്ഷ്യമിടുന്നത്. ലാഭ-നഷ്ടത്തിന്റെ വിഹിതമായിരിക്കും നിക്ഷേപകര്‍ക്ക് ലഭിക്കുക.