കൊല്ലം: കേന്ദ്രമന്ത്രിയുടെ ഇടപെടലില്‍ കുതിരയെ ക്രൂരമായി മര്‍ദിച്ച ബംഗാളി സംരക്ഷകന്‍ അറസ്റ്റില്‍. കൊല്ലം ബീച്ചില്‍ കുതിരയെ പി.വി.സി പൈപ്പ് കൊണ്ട് ക്രൂരമായി മര്‍ദിച്ച സംഭവത്തിലാണ് കുതിരയുടെ സംരക്ഷകനായ ബംഗാള്‍ സ്വദേശി ഹുസൈനെ പൊലിസ് അറസ്റ്റ് ചെയ്തത്.
കഴിഞ്ഞ 19ന് ആയിരുന്നു സംഭവം. ബീച്ചിലെ ഗാന്ധി പാര്‍ക്കില്‍ കെട്ടിയിരുന്ന എട്ടുമാസം പ്രായമായ ലക്ഷ്മിയെന്ന കുതിര കെട്ടഴിഞ്ഞ് റോഡിലേക്കിറങ്ങിയോടി. പിന്നാലെ പോയ ഹുസൈന്‍ കുതിരയെ തിരികെയെത്തിച്ചശേഷം പി.വി.സി പൈപ്പ് കൊണ്ടു ക്രൂരമായി മര്‍ദിക്കുകയായിരുന്നു.
ആക്രമണദൃശ്യങ്ങള്‍ പാര്‍ക്കിലെത്തിയ യുവാവു മൊബൈലില്‍ പകര്‍ത്തുകയും സാമൂഹികമാധ്യമങ്ങളിലൂടെ പ്രചരിപ്പിക്കുകയും ചെയ്തു. തുടര്‍ന്ന് കൊല്ലം ചീഫ് വെറ്ററിനറി ഓഫിസര്‍ ഡോക്ടര്‍ തോമസിന്റെ നിര്‍ദേശപ്രകാരം എസ്.പി.സി.എ പാര്‍ക്കിലെത്തി കുതിരയെ പരിശോധിക്കുകയും പൊലിസില്‍ രേഖാ മൂലം പരാതിപ്പെടുകയുമായിരുന്നു.
സംഭവം സാമൂഹികമാധ്യമങ്ങളില്‍ വൈറലായതിനെ തുടര്‍ന്ന് ശ്രദ്ധയില്‍പ്പെട്ട കേന്ദ്രമന്ത്രി മേനകാഗാന്ധി എസ്.പി.സിയുമായും പൊലിസുമായും ബന്ധപ്പെടുകയും ശക്തമായ നടപടിയെടുക്കാന്‍ നിര്‍ദേശിക്കുകയും ചെയ്തു. സംഭവദിവസം തന്നെ ഇയാളെ ജോലിയില്‍നിന്നു ബീച്ചിന്റെ നടത്തിപ്പുകാരന്‍ പിരിച്ചുവിട്ടിരുന്നു.