ന്യൂഡല്‍ഹി: ഇന്ത്യന്‍ സംഗീതത്തിന്റെ മുടിചൂടാമന്നനായ മുഹമ്മദ് റഫിക്ക് ഗൂഗിളിന്റെ ആദരം. റഫിയുടെ 93ാം ജന്മദിനത്തോട് അനുബന്ധിച്ച് മനോഹരമായ ഡൂഡിള്‍ പുറത്തിറക്കിയാണ് ഗൂഗ്ള്‍ സംഗീത ചക്രവര്‍ത്തിയെ ആദരിച്ചത്.

1924 ഡിസംബര്‍ 24ന് പഞ്ചാബിലെ അമൃതസര്‍ ജില്ലയിലെ കോട്ട്‌ല സുല്‍ത്താന്‍ സിങ് എന്ന ഗ്രാമത്തില്‍ ഹാജി അലി മുഹമ്മദിന്റെ എട്ടു മക്കളില്‍ ഏഴാമനായി ജനനം. സംഗീതപൂര്‍ണമായിരുന്നു പരമ്പരാഗത കുടുംബത്തില്‍ നിന്ന് ഇന്ത്യന്‍ സംഗീതത്തിന്റെ അതികായനായി വളര്‍ന്ന മുഹമ്മദ് റഫിയുടെ ജീവിതം. അലഞ്ഞു തിരിയുന്ന ഒരു ഫക്കീറാണ് റഫിയുടെ ആദ്യഗുരുവെന്നു പറയാം. അദ്ദേഹം പാടി നടന്നിരുന്ന സങ്കീര്‍ത്തനങ്ങള്‍ അനുകരികരിക്കുകയായിരുന്നു കുഞ്ഞു റഫിയുടെ ഇഷ്ട ഹോബി. വളര്‍ന്നപ്പോള്‍ അദ്ദേഹം ബന്ധുവിന്റെ ബാര്‍ബര്‍ ഷാപ്പില്‍ ജോലി നോക്കി. അന്നത്തെ സിനിമാ സാംസാകാരിക വേദി കൂടിയായിരുന്നു ആ ബാര്‍ബര്‍ ഷോപ്പ്. അവിടം റഫിക്ക് തന്റെ കഴിവ് പ്രകടിപ്പിക്കാനുള്ള വേദി കൂടിയായിരുന്നു.

അദ്ദേഹത്തിന്റെ പ്രതിഭ തിരിച്ചറിഞ്ഞ സഹോദരന്‍ പിതാവിന്റെ എതിര്‍പ്പുകള്‍ വകവെക്കാതെ ഉസ്താദ് അബ്ദുല്‍ വാഹിദ് ഖാന് കീഴില്‍ പാട്ട് പഠിക്കാന്‍ വിട്ടു. പിന്നീടങ്ങോട്ട് അദ്ദേഹത്തിന്റെ വളര്‍ച്ചയുടെ നാളുകളായിരുന്നു. 40 വര്‍ഷത്തെ സംഗീത ജീവിതിത്തിനിടയില്‍ ഹിന്ദി, ഇംഗ്ലീഷ്, അറബിക്, പേര്‍ഷ്യന്‍, ഡച്ച് തുടങ്ങി നിരവധി ഭാഷകളിലായി 5000ത്തോളം ഗാനങ്ങള്‍ പാടിയിട്ടുണ്ട്.

എസ്.ഡി ബര്‍മന്‍, ശങ്കര്‍ജയകൃഷ്ണന്‍, മദന്‍ മോഹന്‍, ഒ.പി നയ്യാന്‍ എന്നിവര്‍ക്കൊപ്പമെല്ലാം റാഫി പ്രവര്‍ത്തിച്ചിട്ടുണ്ട്.

ആണ്ടുകള്‍ ഇത്ര കഴിഞ്ഞിട്ടും പാട്ടിനെ സ്‌നേഹിക്കുന്നവര്‍ക്ക്, പ്രായഭേദമില്ലാത്ത ഒരു വികാരമാണ് റഫി.