ഷിംല: തര്‍ക്കങ്ങള്‍ക്കൊടുവില്‍ ഹിമാചല്‍ പ്രദേശില്‍ മുഖ്യമന്ത്രിയെ പ്രഖ്യാപിച്ചു. അഞ്ചു തവണ എം.എല്‍.എയായ ബി.ജെ.പി നേതാവ് ജയ്‌റാം താക്കൂര്‍ മുഖ്യമന്ത്രിയായി സ്ഥാനമേല്‍ക്കും. കേന്ദ്ര നേതാക്കളായ നിര്‍മല സീതാരാമന്‍ നരേന്ദ്ര സിങ് തോമര്‍ എന്നിവരുടെ നേതൃത്വത്തില്‍ ഇന്ന് ചേര്‍ന്ന് ബിജെപി ഉന്നതതല യോഗത്തിലാണ് ഇക്കാര്യം തീരുമാനിച്ചത്.

ആര്‍.എസ്.എസിന്റെ ശക്തമായ ഇടപെടലാണ് മുഖ്യമന്ത്രി സ്ഥാനാര്‍ഥിത്വത്തില്‍ നിര്‍ണായകമായത്.

ഹിമാചലില്‍ മുഖ്യമന്ത്രി സ്ഥാനാര്‍ഥിയായി ഉയര്‍ത്തിക്കാട്ടിയ പ്രേംകുമാര്‍ ധുമല്‍ തെരഞ്ഞെടുപ്പില്‍ പരാജയപ്പെട്ടതോടെയാണ് ബി.ജെ.പിയില്‍ പ്രതിസന്ധി ഉടലെടുത്തത്.

പ്രേംകുമാര്‍ ധുമല്‍ പരാജയപ്പെട്ട സാഹചര്യത്തില്‍ അദ്ദേഹത്തെ മുഖ്യമന്ത്രിയാക്കുകയും ആറുമാസത്തിനകം ഉപതെരഞ്ഞെടുപ്പിലൂടെ വിജയിപ്പിച്ചെടുക്കണമെന്നുമാണ് വലിയൊരു വിഭാഗം നേതാക്കളും പ്രവര്‍ത്തകരും ആവശ്യപ്പെടുന്നത്.

അതേസമയം അഞ്ചു തവണ എം.എല്‍.എ ആയി തെരഞ്ഞെടുക്കപ്പെട്ട മുതിര്‍ന്ന നേതാവ് ജെയ്‌റാം താക്കൂറിനെ മുഖ്യമന്ത്രിയാക്കണമെന്നാണ് ഒരു വിഭാഗം പ്രവര്‍ത്തകര്‍ ആവശ്യപ്പെടുന്നത്.

ഈ സാഹചര്യത്തിലാണ് സമവായമെന്ന നിലയില്‍ കേന്ദ്ര പ്രതിനിധികളായ പ്രതിരോധ മന്ത്രി നിര്‍മല സീതാരാമന്‍, കേന്ദ്ര നഗരാസൂത്രണ മന്ത്രി നരേന്ദര്‍ സിങ് തോമര്‍ എന്നിവരുടെ നേതൃത്വത്തില്‍ മാരത്തോണ്‍ ചര്‍ച്ച നടത്തിയത്. ധുമല്‍ പക്ഷം നിലപാട് മയപ്പെടുത്തിയതിനെ തുടര്‍ന്നാണ് ജയ്‌റാം താക്കൂറിന് അവസരം ലഭിച്ചത്.