കാസര്‍കോട്: വിദ്യാര്‍ഥിനിയെ ലൈംഗികമായി പീഡിപ്പിച്ച സംഭവത്തില്‍ പിതാവ് അറസ്റ്റിലായതിനു പിന്നാലെ മാതാവിനെയും പൊലിസ് അറസ്റ്റു ചെയ്തു. പിതാവ് തന്നെ പീഡിപ്പിക്കുന്ന സമയത്തൊക്കെ മാതാവ് ഇതിന് ഒത്താശ ചെയ്തതായി വിദ്യാര്‍ഥിനി പൊലിസില്‍ മൊഴിനല്‍കിയതിനെ തുടര്‍ന്നാണ് ഇവരെയും പൊലിസ് അറസ്റ്റു ചെയ്തത്.
ചോദ്യം ചെയ്ത ശേഷമായിരുന്നു 45കാരിയായ മാതാവിന്റെ അറസ്റ്റ്. ഇവരെ കോടതിയില്‍ ഹാജരാക്കിയ ശേഷം കാഞ്ഞങ്ങാട് സബ് ജയിലില്‍ റിമാന്‍ഡ് ചെയ്തു. വിദ്യാര്‍ഥിനിയായ മകളെ എട്ടു വര്‍ഷത്തോളമായി പിതാവ് ഭീഷണിപ്പെടുത്തി പീഡിപ്പിച്ചു വരികയായിരുന്നുവെന്നായിരുന്നു പരാതി.
പെണ്‍കുട്ടി വിവരം മാതാവിനോട് പറഞ്ഞിരുന്നു. എന്നാല്‍ ഭര്‍ത്താവ് ഇവരെ ഉപേക്ഷിച്ചേക്കുമെന്ന് ഭയന്ന് മാതാവ് വിവരം മൂടിവയ്ക്കുകയും ഒത്താശ ചെയ്യുകയുമായിരുന്നുവെന്ന് പൊലിസ് പറഞ്ഞു.
നഗരപരിധിയിലെ വാടക ക്വാര്‍ട്ടേഴ്‌സിലാണ് ഈ കുടുംബം കഴിഞ്ഞു വന്നിരുന്നത്. മകളെ പീഡിപ്പിച്ച പിതാവ് മൂന്നു വിവാഹം കഴിച്ചതായും നിലവില്‍ രണ്ടു ഭാര്യമാര്‍ ഇയാള്‍ക്കുള്ളതായും പറയുന്നു.