മിലാന്‍: ഇറ്റാലിയന്‍ സീരി എ ടീം നാപോളിക്കായി ഏറ്റവും കൂടുതല്‍ ഗോള്‍ നേടുന്ന താരമെന്ന റെക്കോര്‍ഡ് സ്ലോവാക്യന്‍ മധ്യനിര താരം മരെക് ഹംസികിന്. ഇതിഹാസ താരം ഡീഗോ മറഡോണയുടെ പേരില്‍ വര്‍ഷങ്ങളോളം നിന്ന റെക്കോര്‍ഡാണ് കഴിഞ്ഞ ദിവസം ഹംസിക് മറികടന്നത്. മറഡോണ നാപോളിക്കായി 115 ഗോളുകളാണ് നേടിയത്. കഴിഞ്ഞ ദിവസം ടൊറിനോയ്‌ക്കെതിരായ പോരാട്ടത്തില്‍ ഗോള്‍ നേടി ഹംസിക് നേട്ടം 116ല്‍ എത്തിച്ചാണ് റെക്കോര്‍ഡ് സ്വന്തം പേരിലാക്കിയത്. 1984 മുതല്‍ 91 വരെ നാപോളിക്കായി കളിച്ചാണ് മറഡോണ ക്ലബിന്റെ എക്കാലത്തേയും വലിയ ഗോള്‍ സ്‌കോററായത്. നാപോളി ക്ലബിനൊപ്പം ഹംസികിന്റെ പതിനൊന്നാം സീസണാണിത്. 478 മത്സരങ്ങളില്‍ നിന്നാണ് ക്ലബിനായി 30കാരനായ ഹംസിക് 116 തവണ വല ചലിപ്പിച്ചത്.