മെല്‍ബണ്‍: ആസ്‌ത്രേലിയയും ഇംഗ്ലണ്ടും തമ്മിലുള്ള ആഷസ് പരമ്പരയിലെ നാലാം ടെസ്റ്റിന് നാളെ മെല്‍ബണില്‍ തുടക്കമാകും. ആദ്യ മൂന്ന് മത്സരങ്ങളിലും ആധികാരിക വിജയം സ്വന്തമാക്കി ആഷസ് തിരിച്ചുപിടിച്ചതിന്റെ ആത്മവിശ്വാസത്തിലാണ് ആസ്‌ത്രേലിയ നാളെ ബോക്‌സിങ് ഡേ ടെസ്റ്റിനിറങ്ങുന്നത്.
അഞ്ച് മത്സരങ്ങളടങ്ങിയ പരമ്പര തൂത്തുവാരുക ലക്ഷ്യമിട്ടാണ് ഓസീസ് ഇറങ്ങുന്നതെങ്കില്‍ പരമ്പര കൈവിട്ട സ്ഥിതിക്ക് മുഖം രക്ഷിക്കുകയാണ് ഇംഗ്ലണ്ടിന് മുന്നിലുള്ള വെല്ലുവിളി.
ക്യാപ്റ്റന്‍ സ്റ്റീവന്‍ സ്മിത്ത് മാരക ഫോമില്‍ നില്‍ക്കുന്നത് തന്നെയാണ് ഓസീസിന്റെ കരുത്ത്. ഒപ്പം മിച്ചല്‍, ഷോണ്‍ മാര്‍ഷ് സഹോദരന്‍മാരുടെ ഫോമും ആസ്‌ത്രേലിയക്ക് മുതല്‍കൂട്ടാണ്. അതേസമയം പരുക്കേറ്റ് മിച്ചല്‍ സ്റ്റാര്‍ക്കിന് കളിക്കാന്‍ സാധിക്കാത്തതാണ് ആസ്‌ത്രേലിയക്കുള്ള ഏക വേവലാതി.
ജാക്‌സന്‍ ബേര്‍ഡായിരിക്കും സ്റ്റാര്‍ക്കിന് പകരം ഇറങ്ങുന്നത്. ഇംഗ്ലീഷ് നിരയില്‍ പേസര്‍ ക്രെയ്ഗ് ഓവര്‍ടനും കളിക്കില്ല. താരത്തിനും പരുക്കാണ് തിരിച്ചടിയായത്.