കാഞ്ഞങ്ങാട്: നിയോജക മണ്ഡലത്തില്‍ സമ്പൂര്‍ണ്ണ വൈദ്യുതീകരണം വേഗത്തിലാക്കുമെന്നും ഇതിനായി  കെ.എസ്.ഇ.ബി, റവന്യൂ, തദ്ദേശ സ്വയംഭരണ വകുപ്പുകളുടെ  കൂട്ടായ സഹകരണം ആവശ്യമാണെന്നും  റവന്യൂ വകുപ്പ് മന്ത്രി ഇ. ചന്ദ്രശേഖരന്‍ പറഞ്ഞു. 2017 മാര്‍ച്ചോടെ കേരളം സമ്പൂര്‍ണ്ണ വൈദ്യുതീകരണ സംസ്ഥാനമായി  പ്രഖ്യാപിക്കുന്നതിന്റെ ഭാഗമായി  പൊതുമരാമത്ത്  വിശ്രമ കേന്ദ്രത്തില്‍  നടത്തിയ കാഞ്ഞങ്ങാട് മണ്ഡലം തല യോഗത്തില്‍ അധ്യക്ഷത വഹിച്ച്  സംസാരിക്കുകയായിരുന്നു അദ്ദേഹം.  വൈദ്യുതീകരണത്തിനായി  മണ്ഡലത്തില്‍  ഇതുവരെ 1531 അപേക്ഷകളാണ് ലഭിച്ചിട്ടുളളത്. ഇനിയും വൈദ്യുതീകരിക്കാത്ത വീട്ടുകാരെ  അപേക്ഷ കൊടുക്കുന്നതിന്  തദ്ദേശ സ്വയംഭരണസ്ഥാപന അധികൃതര്‍  പ്രേരിപ്പിക്കണം.  സെപ്റ്റംബര്‍ എട്ട് വരെ  അപേക്ഷ സമര്‍പ്പിക്കാം. യോഗത്തില്‍ കാഞ്ഞങ്ങാട് നഗരസഭാ ചെയര്‍മാന്‍ വി.വി രമേശന്‍, കാഞ്ഞങ്ങാട് ബ്ലോക്ക്  പഞ്ചായത്ത് പ്രസിഡന്റ് എം. ഗൗരി,  പരപ്പ ബ്ലോക്ക് പഞ്ചായത്ത് പ്രസിഡന്റ് പി. രാജന്‍, വിവിധ ഗ്രാമപഞ്ചായത്ത് പ്രസിഡന്റുമാരായ  പി. ദാമോദരന്‍, സി. കുഞ്ഞിക്കണ്ണന്‍, സി. പ്രഭാകരന്‍, എം. രാധാമണി, പി.ജി മോഹനന്‍, എ. വിധുബാല, കെ.എസ്.ഇ.ബി എക്‌സിക്യുട്ടീവ് എന്‍ജിനീയര്‍  സി.ജി സുഗതന്‍, അസി. എക്‌സിക്യുട്ടീവ്  എന്‍ജിനീയര്‍  വി.വി ഉമേശന്‍ തുടങ്ങിയവര്‍ പങ്കെടുത്തു.