ജിദ്ദ: സഊദിയിലെ റിയാദ് കിങ് ഖാലിദ് വിമാനത്താവളത്തില്‍ കാണാതായ മൂന്നു മലയാളികളെ കണ്ടെത്തി. വിമാനത്താവളത്തിലെ കാര്‍ഗോ വിഭാഗത്തില്‍ ജോലി ചെയ്തിരുന്ന മലപ്പുറം സ്വദേശികളായ മുഹമ്മദ് ജനീഷ് പാറക്കല്‍, ഇസ്ഹാഖ് ഇല്ലിക്കല്‍, കോഴിക്കോട് സ്വദേശി സുരേഷ്‌കുമാര്‍ എന്നിവരാണ് കഴിഞ്ഞ ദിവസം റൂമില്‍ തിരിച്ചെത്തിയത്.
വിദേശത്തുനിന്നെത്തിയ വിലപിടിപ്പുള്ള വസ്തുക്കള്‍ കാണാനില്ലെന്ന കേസിന്റെ പേരില്‍ പൊലിസിന്റെ പിടിയിലായ ഇവരെ അന്വേഷണ ഉദ്യോഗസ്ഥര്‍ ചോദ്യം ചെയ്തുവരികയായിരുന്നു. മറ്റൊരു മലയാളിയെ കൂടി ഉദ്യോഗസ്ഥര്‍ ചോദ്യം ചെയ്തിട്ടുണ്ട്. ഇപ്പോള്‍ പൊലിസ് കസ്റ്റഡിയിലുള്ള ഇയാളുടെ പേരുവിവരങ്ങള്‍ പുറത്തുവിട്ടിട്ടില്ല.
ഈ മാസം ഒന്‍പതിനാണ് ഇവരെ കാണാനില്ലെന്ന് കാണിച്ച് ബന്ധുക്കള്‍ ഇന്ത്യന്‍ എംബസിയില്‍ പരാതി നല്‍കിയത്. തുടര്‍ന്ന് എംബസി റിയാദ് കെ.എം.സി.സി മലപ്പുറം കണ്‍വീനര്‍ സിദ്ദീഖ് തുവ്വൂരിനെ കേസുമായി ബന്ധപ്പെടുത്തി കാര്യങ്ങള്‍ക്കു ചുമതലപ്പെടുത്തുകയായിരുന്നു.
തുടര്‍ന്ന് സിദ്ദീഖിന്റെ നേതൃത്വത്തില്‍ വിവിധ പൊലിസ് സ്റ്റേഷനുകളില്‍ നടത്തിയ അന്വേഷണത്തിലാണ് ഇവര്‍ കസ്റ്റഡിയിലുള്ള വിവരം അറിയുന്നത്.
സഊദി എയര്‍ലൈന്‍സിന്റെ കാര്‍ഗോ വിഭാഗത്തില്‍ ജോലി ചെയ്തിരുന്ന ഇവരെ കാര്‍ഗോ സംബന്ധമായ കേസന്വേഷണത്തിന്റെ ഭാഗമായായിരുന്നു കസ്റ്റഡിയിലെടുത്തത്.