കണ്ണൂര്‍: സംസ്ഥാനത്തെ ട്രഷറികളില്‍ നടപ്പാക്കിയ പുത്തന്‍ പരിഷ്‌കാരങ്ങള്‍ കാരണം വിദ്യാഭ്യാസവകുപ്പില്‍ ദിവസവേതനക്കാരായി ജോലി ചെയ്യുന്ന ആയിരക്കണക്കിന് ജീവനക്കാര്‍ രണ്ട് മാസമായി ശമ്പളമില്ലാതെ ദുരിതത്തില്‍. ദിവസവേതനം വാങ്ങുന്നവരുടെ ശമ്പള ബില്ലിലെ ഹെഡ് ഓഫ് അക്കൗണ്ട് മാറ്റിയതാണ് ഈ അവസ്ഥയ്ക്ക് കാരണം.
ഇതേത്തുടര്‍ന്ന് രണ്ടു മാസമായി ബില്ലുകള്‍ മാറാനാവാത്ത സ്ഥിതിയാണ്. സംസ്ഥാനത്തെ എല്ലാ വകുപ്പുകളിലുമുള്ള ദിവസവേതനക്കാര്‍ക്ക് ഈ പ്രശ്‌നമുണ്ടായിരുന്നെങ്കിലും ഇത് അതത് വിഭാഗങ്ങള്‍ ധനകാര്യവകുപ്പുമായി ബന്ധപ്പെട്ട് പരിഹരിച്ചിരുന്നു.
കഴിഞ്ഞ ബജറ്റിലാണ് സംസ്ഥാനത്തെ ദിവസവേതനം വാങ്ങുന്ന ജീവനക്കാരുടെ ഹെഡ് ഓഫ് അക്കൗണ്ട് മാറ്റാന്‍ തീരുമാനിച്ചത്. മറ്റു വകുപ്പുകളില്‍ ഈ പരിഷ്‌കാരം കൃത്യമായി നടപ്പിലാക്കിയപ്പോള്‍ വിദ്യാഭ്യാസവകുപ്പിലെ ദിവസവേതനക്കാരുടെ കാര്യത്തില്‍ മാത്രം അനിശ്ചിതാവസ്ഥ തുടരുകയാണ്. പ്രശ്‌നത്തില്‍ വിദ്യാഭ്യാസവകുപ്പ് കൃത്യമായി ഇടപെടാത്തതാണ് അനിശ്ചിതത്വത്തിന് കാരണമെന്ന് ട്രഷറി വകുപ്പിലെ ഉദ്യോഗസ്ഥര്‍ പറയുന്നു. എന്നാല്‍ മാറിയ ഹെഡ് ഓഫ് അക്കൗണ്ട് സ്പാര്‍ക് വെബ്‌സൈറ്റുമായി ട്രഷറി വകുപ്പ് ബന്ധിപ്പിക്കാത്തതാണ് ദിവസവേതനക്കാരുടെ വേതനം മുടങ്ങാന്‍ കാരണമെന്ന് മറുവിഭാഗവും ആരോപിക്കുന്നു. സ്പാര്‍ക് വെബ്‌സൈറ്റിലൂടെയാണ് വിദ്യാഭ്യാസവകുപ്പിലെ ജീവനക്കാര്‍ക്ക് ശമ്പളവിതരണം നിര്‍വഹിക്കുന്നത്. സംസ്ഥാനത്തൊട്ടാകെ ആയിരത്തിലധികം ആളുകളാണ് ഇതുമൂലം ദുരിതമനുഭവിക്കുന്നത്. വകുപ്പുകളുടെ അനാസ്ഥ കാരണം ക്രിസ്മസിനു പോലും ജോലി ചെയ്തതിന്റെ പ്രതിഫലം ലഭിക്കാത്ത അവസ്ഥയാണ്.