തെഹ്‌റാന്‍: തങ്ങള്‍ക്കെതിരായ കടുത്ത നിലപാട് തുടരുകയാണെങ്കില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് പരാജയപ്പെടുമെന്ന് ഇറാന്‍ പരമോന്നത നേതാവ് ആയത്തുല്ല അലി ഖാംനഇ. ട്രംപിനെക്കാള്‍ കൂടുതല്‍ ബുദ്ധിമാനും ശക്തനുമായിരുന്ന റൊണാള്‍ഡ് റീഗന്‍ അമേരിക്ക ഭരിച്ച കാലത്തേതിനെക്കാള്‍ ശക്തമാണ് ഇപ്പോള്‍ ഇറാനെന്നും അദ്ദേഹം പറഞ്ഞു.
ഞങ്ങള്‍ക്കെതിരേ ഭീഷണി മുഴക്കുന്ന കാര്യത്തില്‍ റീഗന്‍ ട്രംപിനെക്കാള്‍ സമര്‍ത്ഥനായിരുന്നു. അദ്ദേഹം ഞങ്ങള്‍ക്കെതിരേ തിരിയുകയും ഞങ്ങളുടെ വിമാനം വെടിവച്ചു വീഴ്ത്തുക വരെ ചെയ്തു. എന്നാല്‍, ഇന്ന് ഇറാന്‍ എല്ലാ മേഖലയിലും അക്കാലത്തേതിനെക്കാള്‍ ഏറെ പുരോഗതി കൈവരിച്ചിരിക്കുന്നു. ഇറാന്‍ ഇസ്‌ലാമിക് റിപബ്ലിക്കിനെ തകര്‍ക്കാമെന്ന് ട്രംപ് കരുതുന്നുവെങ്കില്‍ അത് വ്യര്‍ഥമാണ്-ഖാംനഇ വ്യക്തമാക്കി.