ഇന്‍ഡോര്‍: വിദര്‍ഭയ്‌ക്കെതിരായ രഞ്ജി ട്രോഫി ക്രിക്കറ്റ് ഫൈനല്‍ പോരാട്ടത്തില്‍ ഡല്‍ഹി പൊരുതുന്നു. ഒന്നാം ദിനം കളി അവസാനിക്കുമ്പോള്‍ ഡല്‍ഹി ആറ് വിക്കറ്റ് നഷ്ടത്തില്‍ 271 റണ്‍സെന്ന നിലയില്‍. സെഞ്ച്വറി നേടി പുറത്താകാതെ നില്‍ക്കുന്ന ധ്രുവ് ഷൂരി (123), വികാസ് മിശ്ര (അഞ്ച്) എന്നിവരാണ് ക്രീസില്‍.
ടോസ് നേടി ബൗളിങ് തിരഞ്ഞെടുത്ത വിദര്‍ഭ തുടക്കത്തില്‍ ഡല്‍ഹിയെ ഞെട്ടിച്ചു. നാല് വിക്കറ്റ് നഷ്ടത്തില്‍ 99 റണ്‍സെന്ന നിലയില്‍ പതറിയ ഡല്‍ഹിയെ സെഞ്ച്വറി നേടിയ ഷൂരിയും ആറാമനായി ക്രീസിലെത്തി അര്‍ധ സെഞ്ച്വറിയുമായി തിളങ്ങിയ (66) ഹിമ്മത് സിങും ചേര്‍ന്ന് കരകയറ്റുകയായിരുന്നു. വിദര്‍ഭയ്ക്കായി ആദിത്യ താക്കറെ, ഗുര്‍ബാനി എന്നിവര്‍ രണ്ടും സിദ്ധേഷ് നെരല്‍, അക്ഷയ് വഖര്‍ എന്നിവര്‍ ഓരോ വിക്കറ്റും വീഴ്ത്തി.