മെല്‍ബണ്‍: അലിസ്റ്റര്‍ കുക്കിന്റെ അപരാജിത ഇരട്ട സെഞ്ച്വറി പ്രകടനത്തില്‍ പതറിപ്പോയ ആസ്‌ത്രേലിയ ആഷസ് പരമ്പരയിലെ നാലാം ടെസ്റ്റില്‍ പൊരുതുന്നു.
ഇംഗ്ലണ്ടിന്റെ ഒന്നാം ഇന്നിങ്‌സ് 491 റണ്‍സില്‍ അവസാനിപ്പിച്ച് 164 റണ്‍സ് ലീഡ് വഴങ്ങി രണ്ടാം ഇന്നിങ്‌സ് തുടങ്ങിയ ഓസീസ് നാലാം ദിനം കളി അവസാനിപ്പിക്കുമ്പോള്‍ രണ്ട് വിക്കറ്റ് നഷ്ടത്തില്‍ 103 റണ്‍സെന്ന നിലയിലാണ്. എട്ട് വിക്കറ്റുകള്‍ ശേഷിക്കേ ആസ്‌ത്രേലിയക്ക് ഇംഗ്ലണ്ടിന്റെ ലീഡ് മറികടക്കാന്‍ 62 റണ്‍സ് കൂടി വേണം. 40 റണ്‍സുമായി ഓപണര്‍ ഡേവിഡ് വാര്‍ണറും 25 റണ്‍സുമായി ക്യാപ്റ്റന്‍ സ്റ്റീവന്‍ സ്മിത്തുമാണ് ക്രീസില്‍. ബെന്‍ക്രോഫ്റ്റ് (27), ഉസ്മാന്‍ ഖവാജ (11) എന്നിവരാണ് പുറത്തായത്. ഇന്ന് ഒരു ദിവസം മാത്രം അവശേഷിക്കേ മത്സരം സമനിലയില്‍ അവസാനിക്കുമെന്ന് ഏതാണ്ടുറപ്പായി.
നേരത്തെ ഒന്‍പത് വിക്കറ്റ് നഷ്ടത്തില്‍ 491 റണ്‍സെന്ന നിലയില്‍ നാലാം ദിനം തുടങ്ങിയ ഇംഗ്ലണ്ടിന്റെ പോരാട്ടം അതേ സ്‌കോറില്‍ തന്നെ അവസാനിച്ചു. അവസാന ബാറ്റ്‌സ്മാനായ ജെയിംസ് ആന്‍ഡേഴ്‌സനെ റണ്ണൊന്നുമെടുക്കാന്‍ അനുവദിക്കാതെ കമ്മിന്‍സ് പുറത്താക്കുകയായിരുന്നു. ഉജ്ജ്വല ഇരട്ട സെഞ്ച്വറിയുമായി ഇംഗ്ലണ്ടിനെ മികച്ച സ്‌കോറിലെത്തിച്ച അലിസ്റ്റര്‍ കുക്ക് 409 പന്തുകള്‍ നേരിട്ട് 244 റണ്‍സുമായി പുറത്താകാതെ നിന്നു. ഓസീസിനായി കമ്മിന്‍സ് നാല് വിക്കറ്റുകള്‍ വീഴ്ത്തി. ഹാസ്‌ലെവുഡ്, നതാന്‍ ലിയോണ്‍, എന്നിവര്‍ മൂന്ന് വിക്കറ്റുകളും പിഴുത് ഇംഗ്ലണ്ടിന്റെ പത്ത് വിക്കറ്റുകള്‍ പങ്കിട്ടു.