തെല്‍ അവീവ്: ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു ഇന്ത്യയില്‍ വരുന്നു. ജനുവരിയിലായിരിക്കും നെതന്യാഹുവിന്റെ സന്ദര്‍ശനം. കൂടെ, മുംബൈ ഭീകരാക്രമണത്തില്‍ നിന്ന് രക്ഷപ്പെട്ട ജൂത ബാലന്‍ മോഷെ ഹോസ്‌ബെര്‍ഗുമുണ്ടാവും.

പ്രധാനമന്ത്രി നരേന്ദ്ര മോദി ഫെബ്രുവരിയില്‍ ഫലസ്തീന്‍ സന്ദര്‍ശനം നടത്തുമെന്ന സൂചനയ്ക്കിടെയാണ് നെതന്യാഹുവിന്റെ ഇന്ത്യാ സന്ദര്‍ശനം.

കഴിഞ്ഞ ജൂലൈയില്‍ ഇസ്‌റാഈല്‍ സന്ദര്‍ശനത്തിനിടെ മോഷെയെന്ന 11 കാരനെ മോദി കണ്ടിരുന്നു. 2008 മുംബൈ ഭീകരാക്രമണത്തില്‍ മാതാപിതാക്കളെ നഷ്ടപ്പെട്ട മോഷെ പിന്നീട് ഇസ്‌റാഈലിലേക്ക് പോവുകയായിരുന്നു. അവിടെ മുത്തച്ഛന്‍ റാബി ശിമോന്റെയും ഭാര്യ യെഹൂദിറ്റ് റോസെന്‍ബര്‍ഗിന്റെയും കൂടെയാണ് കഴിയുന്നത്.

നെതന്യാഹുവിന്റെ ഭാര്യയും കൂടെയുണ്ടാവും. ഡല്‍ഹിയിലെ ചര്‍ച്ചയ്ക്കു പുറമെ, ആഗ്രയിലെത്തി താജ്മഹല്‍ കൂടി അവര്‍ സന്ദര്‍ശിക്കും. തുടര്‍ന്ന് മുംബൈയില്‍ മോഷെ താമസിച്ചിരുന്ന സ്ഥലത്തെത്തും.