ജിദ്ദ: സഊദിയില്‍ ഇനി സ്വര്‍ണം വാങ്ങുന്നവര്‍ തിരിച്ചറിയല്‍ രേഖ നല്‍കണം. വില്‍ക്കുന്ന കടയുടെ മുഴുവന്‍ വിവരങ്ങളും സ്വര്‍ണ്ണത്തിന്റെ അളവും ഉള്‍പ്പെടുത്തി വ്യാപാരി ബില്ല് ഉപഭോക്താവിന് നല്‍കണമെന്നുമാണ് വാണിജ്യ നിക്ഷേപ മന്ത്രാലയത്തിന്റെ പുതിയ ഉത്തരവ്.

സ്വര്‍ണം വാങ്ങുന്നവര്‍ക്ക് അവരുടെ തിരിച്ചറിയല്‍ രേഖയുടെ നമ്പര്‍ സഹിതമുള്ള ബില്ല് നല്‍കാന്‍ ജ്വല്ലറി ഉടമകള്‍ ബാധ്യസ്ഥരാണെന്നു വാണിജ്യ നിക്ഷേപ മന്ത്രാലയം വ്യക്തമാക്കി. കടയുടെ പേര്, ലൈസന്‍സ് നമ്പര്‍, സ്വര്‍ണത്തിന്റെ ഗ്രാം തിരിച്ചുള്ള വില, സ്വര്‍ണം വാങ്ങുന്നവരുടെ ഇഖാമ നമ്പര്‍ എന്നിവയെല്ലാം വ്യക്തമാക്കുന്ന ബില്ലാണ് ഉപഭോക്താവിന് നല്‍കേണ്ടതെന്ന് മന്ത്രാലയം അറിയിച്ചു.

അതേസമയം രത്‌നങ്ങള്‍ വാങ്ങുന്ന ഉപഭോക്താവിന് അതിന്റെ ഇനവും തൂക്കവും വിലയും തീയതിയും വ്യക്തമാക്കുന്ന ബില്ല് നല്‍കണം. ഉയര്‍ന്ന വിലകൊടുത്തു സ്വര്‍ണവും രത്‌നങ്ങളും വാങ്ങുന്ന ഉപഭോക്താക്കള്‍ക്ക് ഇത് സംബന്ധിച്ച് ബോധവല്‍ക്കരണം നടത്തണമെന്ന് ചേംബര്‍ ഓഫ് കൊമേഴ്‌സ് അസിസ്റ്റന്റ് സെക്രട്ടറി ഹമൂദ് അല്‍ റാബിയ ആവശ്യപ്പെട്ടു. ഉപഭോക്താക്കള്‍ വഞ്ചിക്കപ്പെടാന്‍ പാടില്ല എന്ന ലക്ഷ്യത്തോടെയാണ് പുതിയ നിബന്ധന ബാധകമാക്കിയതെന്നു വാണിജ്യ നിക്ഷേപ മന്ത്രാലയം വ്യക്തമാക്കി.

അതേ സമയം സ്വര്‍ണ്ണക്കടകളിലെ സ്വദേശിവത്ക്കരണം പാലിക്കാത്ത 212 സ്ഥാപനങ്ങള്‍ക്കെതിരെ നടപടിയുണ്ടാകുമെന്നും തൊഴില്‍ മന്ത്രാലയം അറിയിച്ചു. രാജ്യത്തെ ആറായിരത്തിലേറെ ജ്വല്ലറികളിലെ പരിശോധന അന്തിമ ഘട്ടത്തിലെത്തി. സ്വദേശിവത്ക്കരണം പൂര്‍ത്തിയാകുന്നതോടെ മുപ്പത്തിഅയ്യായിരം വിദേശികള്‍ക്ക് ജോലി നഷ്ടമാകും. വിവിധ മന്ത്രാലയങ്ങളുടെ ഏകോപനത്തിലുള്ള മേല്‍നോട്ട സമിതിയുടെ നേതൃത്വത്തിലാണ് ജ്വല്ലറി മേഖലയിലെ സ്വദേശിവത്ക്കരണ നടപടികള്‍.