മലപ്പുറം: ചെന്നൈ ഡപ്യൂട്ടി കമ്മിഷണര്‍ ഓഫ് പൊലിസ് ഓഫിസിലെ പൊലിസുദ്ധ്യോഗസ്ഥന്റെ മോഷണം പോയ മൊബൈല്‍ ഫോണ്‍ മലപ്പുറം പൊലിസ് കണ്ടെത്തി. ആഴ്ചകള്‍ക്ക് മുമ്പ് പോക്കറ്റടിക്കപ്പെട്ട മൊബൈല്‍ ഫോണ്‍ ലൊക്കേഷന്‍ മലപ്പുറം ജില്ലയില്‍ ആണെന്ന് കണ്ടത്തിയിരുന്നു.

ചെന്നൈ പൊലിസിന്റെ അഭ്യര്‍ഥന പ്രകാരം മലപ്പുറം പൊലിസ് നടത്തിയ അന്വേഷണത്തിലാണ് മോഷണം പോയ മൊബൈല്‍ മഞ്ചേരിയില്‍ നിന്ന് കണ്ടെടുത്തത്. കൂടാതെ ചെന്നൈ മുതലായ ഭാഗങ്ങളില്‍ നിന്നും മോഷണം ചെയ്യപ്പെടുന്ന മൊബൈല്‍ ഫോണുകള്‍ ജില്ലയിലെ ചില കടകളില്‍ വില്‍പ്പനക്കെത്തുന്നതായും പൊലിസിന് സൂചനകള്‍ ലഭിച്ചിട്ടുണ്ട്.

കണ്ടെത്തിയ മൊബൈല്‍ ഫോണ്‍ ചെന്നൈ പൊലിസിന് കൈമാറി. മലപ്പുറം എസ്‌ഐ ബി.എസ്. ബിനുവിന്റെ നിര്‍ദ്ദേശപ്രകാരം സ്‌പെഷ്യല്‍ സ്‌ക്വാഡ് അംഗം സ്രാമ്പിക്കല്‍ മുഹമ്മദ് ഷാക്കിര്‍ ആണ് അന്വേഷണം നടത്തിയത്.