തിരുവനന്തപുരം: ശക്തമായ പൊലിസ് കാവലിലും സര്‍ക്കാരിന്റെ മുന്‍കരുതല്‍ നിര്‍ദേശത്തിലും കേരളം ഇന്ന് അര്‍ധരാത്രി പുതുവര്‍ഷത്തെ വരവേല്‍ക്കും.
പുതുവര്‍ഷം ആഘോഷിക്കുന്നവര്‍ക്ക് ബുദ്ധിമുട്ടുണ്ടാക്കുന്നരീതിയില്‍ ഇടപെടരുതെന്ന് സംസ്ഥാന പൊലിസ് മേധാവി ലോക്‌നാഥ് ബെഹ്‌റ എല്ലാ എസ്.പിമാര്‍ക്കും നിര്‍ദേശം നല്‍കി. വിനോദസഞ്ചാര കേന്ദ്രങ്ങള്‍ ഇന്ന് രാവിലെ മുതല്‍ തന്നെ സ്‌പെഷല്‍ ബ്രാഞ്ചിന്റെ നിരീക്ഷണത്തിലായിരിക്കും. ഇവിടത്തെ സുരക്ഷാ ചുമതല ഡിവൈ.എസ്.പി റാങ്കിലുള്ള പൊലിസ് ഉദ്യോഗസ്ഥനായിരിക്കും. റോഡുകളിലും ആഘോഷ സ്ഥലങ്ങളിലും ഷാഡോ പൊലിസ് ഉണ്ടാകും. മദ്യപിച്ച് വാഹനം ഓടിക്കുന്നത് ഉള്‍പ്പെടെ എല്ലാ നിയമ ലംഘനങ്ങള്‍ക്കും കര്‍ശന നടപടി എടുക്കാന്‍ എസ്.പിമാര്‍ക്ക് നിര്‍ദേശം നല്‍കിയിട്ടുണ്ട്.
ഇന്ന് വൈകിട്ട് ആറു മുതല്‍ തന്നെ ഇതിനായി ഇടവഴികള്‍ ഉള്‍പ്പെടെ പരിശോധനയുണ്ടാകും. ലഹരി പാര്‍ട്ടികള്‍ നടക്കുമെന്ന് ഇന്റലിജന്‍സ് റിപ്പോര്‍ട്ട് ചെയ്തിട്ടുള്ള ഇടങ്ങളില്‍ കര്‍ശന നിരീക്ഷണം ഏര്‍പ്പെടുത്തും. സ്ത്രീകളുടെയും കുട്ടികളുടെയും മുതിര്‍ന്ന പൗരന്മാരുടെയും സുരക്ഷയ്ക്ക് പ്രത്യേക ഊന്നല്‍ നല്‍കും. നിയമ വിരുദ്ധമായ പ്രവര്‍ത്തനങ്ങള്‍ ശ്രദ്ധയില്‍ പെട്ടാല്‍ ആഘോഷങ്ങളും പരിപാടികളും സംഘടിപ്പിക്കുന്ന സംഘാടകര്‍ ഉടന്‍ പൊലിസിനെ അറിയിക്കണമെന്നും പൊലിസ് മേധാവി നിര്‍ദേശിച്ചിട്ടുണ്ട്.
പുതുവത്സരാഘോഷങ്ങളുമായി ബന്ധപ്പെട്ട് സര്‍ക്കാരും മുന്‍കരുതല്‍ നിര്‍ദേശങ്ങള്‍ പുറപ്പെടുവിച്ചിട്ടുണ്ട്. മുംബൈയിലെ ബഹുനില കെട്ടിടത്തില്‍ ആഘോഷങ്ങള്‍ക്കിടെയുണ്ടായ ദുരന്തത്തിന്റെ പശ്ചാത്തലത്തിലാണ് നിര്‍ദേശം.
ആഘോഷ സ്ഥലങ്ങളിലേയും കെട്ടിടങ്ങളിലെയും ഇലക്ട്രിക്കല്‍ വയറിങും ഉപകരണങ്ങളും പരിശോധിച്ച് സുരക്ഷിതത്വം ഉറപ്പുവരുത്തണം. കെട്ടിടത്തിനുമുകളിലും മൈതാനത്തിലുമുള്ള ഫയര്‍ വാട്ടര്‍ ടാങ്കുകള്‍ നിറച്ചിരിക്കണം. ആവശ്യമായ സാഹചര്യങ്ങളില്‍ പുറത്തുനിന്ന് വെള്ളമെടുക്കുന്നതിന് സൗകര്യം ഒരുക്കിയിരിക്കണം. ഫയര്‍ എസ്‌കേപ്പ് സ്റ്റെയര്‍കേസുകള്‍, എമര്‍ജന്‍സി സ്റ്റെയര്‍കേസുകള്‍, എക്‌സിറ്റുകള്‍ എന്നിവ തടസമില്ലാതെ സജ്ജീകരിച്ചിരിക്കണം. എല്‍.പി.ജി സീരിയല്‍ കണക്ഷന്‍ ഉപയോഗിക്കുന്ന ആഘോഷ സ്ഥലങ്ങളിലും കെട്ടിടങ്ങളിലും ആവശ്യമായ കണ്‍ട്രോള്‍ വാല്‍വുകളും അഗ്നിശമന സംവിധാനങ്ങളും ഉണ്ടാവണം.
അനുവദിച്ച അളവിലും പൊലിസിന്റെ പ്രത്യേക നിര്‍ദേശങ്ങള്‍ക്കനുസരിച്ചുമല്ലാതെ ആഘോഷ സ്ഥലങ്ങളിലോ കെട്ടിടങ്ങളിലോ പടക്കങ്ങള്‍, ഇന്ധനം തുടങ്ങിയവ ഉപയോഗിക്കാനോ സൂക്ഷിക്കാനോ പാടില്ലെന്നും ചീഫ് സെക്രട്ടറിയുടെ സര്‍ക്കുലറില്‍ വ്യക്തമാക്കി.