ജസ്‌നയുടെ തിരോധാനത്തില്‍ തീവ്രവാദ സംഘങ്ങള്‍ക്ക് പങ്കുണ്ടെന്ന് തെളിവില്ല; മരിച്ചുവെന്ന് കണ്ടെത്താന്‍ കഴിഞ്ഞില്ല: സി.ബി.ഐ

തിരുവനന്തപുരം: 2018 ല്‍ കാണാതായ ജസ്‌നയുടെ തിരോധാനത്തിനു പിന്നില്‍ മതതീവ്രവാദ സംഘടനകള്‍ക്ക് ബന്ധമില്ലെന്ന് സി.ബി.ഐ. ജസ്‌ന മരിച്ചുവെന്ന് കണ്ടെത്താന്‍ കഴിഞ്ഞിട്ടില്ലെന്നും സി.ജെ.എം കോടതിയില്‍ സമര്‍പ്പിച്ച 52 പേരുള്ള റിപ്പോര്‍ട്ടില്‍ സി.ബി.ഐ വ്യക്തമാക്കി.

അച്ഛനെയും ആണ്‍ സുഹൃത്തിന്റെയും നുണ പരിശോധന നടത്തിയിരുന്നു. ഇതിലൊന്നും തെളിവ് കിട്ടിയില്ല. ജെസ്‌ന സമൂഹ മാധ്യമങ്ങള്‍ ഉപയോഗിച്ചിരുന്നില്ല. ജെസ്‌നയുമായി ബന്ധപ്പെട്ട് സമീപ സംസ്ഥാനങ്ങളിലും ആത്മഹത്യ പോയിന്റ്‌റുകളിലും പരിശോധന നടത്തി. അന്വേഷണത്തിന് ഇന്റര്‍പോളിന്റെ സഹായം തേടിയിരുന്നു. എന്നാല്‍ എവിടെയും ഒരു തെളിവും കിട്ടിയില്ല.കൂടുതല്‍ എന്തേലും കിട്ടിയാല്‍ അന്വേഷണം തുടരുമെന്നും റിപ്പോര്‍ട്ടില്‍ പറയുന്നു.

അതേ സമയം, ജെസ്‌ന തിരോധാന കേസില്‍ സിബിഐ നല്‍കി റിപ്പോര്‍ട്ടില്‍ ആക്ഷേപമുണ്ടെങ്കില്‍ അറിയിക്കാന്‍ കോടതി നോട്ടീസ് നല്‍കി. ജെസ്‌നയുടെ അച്ഛനാണ് തിരുവനന്തപുരം സിജെഎം കോടതി നോട്ടീസ അയച്ചത്. ജെസ്‌ന കേസില്‍ അന്വേഷണം താല്‍ക്കാലികമായി അവസാനിപ്പിച്ചാണ് സിബിഐ റിപ്പോര്‍ട്ട് നല്‍കിയത്. ഈ റിപ്പോര്‍ട്ട് കോടതി സ്വീകരിക്കുന്നതിന് മുമ്പാണ് പരാതിക്കാരനായ അച്ഛനോട് തര്‍ക്കമുണ്ടെങ്കില്‍ അറിയിക്കാന്‍ കോടതി നോട്ടീസ് നല്‍കിയത്. കേസ് ഈ മാസം 19ന് പരിഗണിക്കും.

2018 മാര്‍ച്ച് 22 നാണ് എരുമേലി മുക്കൂട്ടുതറ സ്വദേശിയായ ജസ്‌നയെ കാണാതായത്. ഇതിന് പിന്നാലെ ലോക്കല്‍ പൊലിസും ക്രൈംബ്രാഞ്ചും വിശദമായ അന്വേഷണം നടത്തിയെങ്കിലും ജസ്‌ന എവിടെയെന്ന് കണ്ടെത്താന്‍ സാധിച്ചിരുന്നില്ല. തുടര്‍ന്ന് കെ.എസ്.യു സംസ്ഥാന പ്രസിഡന്റ് അഭിജിത്, ജസ്‌നയുടെ സഹോദരന്‍ ജെയ്‌സ് ജോണ്‍ എന്നിവര്‍ സി.ബി.ഐ അന്വേഷണം ആവശ്യപ്പെട്ട് ഹരജി നല്‍കി. ഇത് പരിഗണിച്ച ഹൈക്കോടതി ഫെബ്രുവരി 19ന് കേസ് സി.ബി.ഐക്ക് കൈമാറാന്‍ ഉത്തരവിടുകയായിരുന്നു.