മലപ്പുറം: കേന്ദ്ര വനിതാ ശിശു വികസന മന്ത്രാലയത്തിന്റെ പദ്ധതിയായ ചൈല്‍ഡ് ലൈന്‍ സ്വാതന്ത്ര്യ ദിനത്തിന്റെ ഭാഗമായി മലപ്പുറം ഇസ്‌ലാഹിയ ഹയര്‍ സെക്കന്‍ഡറി സ്‌കൂളുമായി സഹകരിച്ച്  മലപ്പുറം നഗരസഭയിലെ തിരഞ്ഞെടുക്കപ്പെട്ട അങ്കണവാടികളില്‍ കുട്ടികള്‍ക്ക്  കളിക്കാനാവശ്യമായ കളിപ്പാട്ടങ്ങള്‍ വിതരണം ചെയ്തു.       
    മലപ്പുറം  നഗരസഭയിലെ കിഴക്കേത്തല 25-ാം വാര്‍ഡില്‍  ഇത്തിള്‍ പറമ്പ് അങ്കണവാടിയില്‍ നടന്ന  പരിപാടി നഗരസഭാ ചെയര്‍പേഴ്‌സണ്‍ സി.എച്ച് ജമീല ഉദ്ഘാടനം നിര്‍വഹിച്ചു.   ശിശുദിനത്തില്‍ മലപ്പുറം ചൈല്‍ഡ് ലൈനുമായി സഹകരിച്ച് ക്ലബുകള്‍, സ്ഥാപനങ്ങള്‍,  വിദ്യാലയങ്ങള്‍, വ്യക്തികള്‍ എന്നീ സംവിധാനങ്ങളെ ഉള്‍ക്കൊള്ളിച്ച്  മലപ്പുറം  നഗരസഭയിലെ മുഴുവന്‍ അങ്കണവാടികളിലേയ്ക്കും 'ചൈല്‍ഡ് ലൈന്‍ സ്‌നേഹ സമ്മാന  പദ്ധതി' വ്യാപിപ്പിക്കുമെന്ന് ചെയര്‍പേഴ്‌സണ്‍ പറഞ്ഞു.  കൂടാതെ മലപ്പുറം നഗരസഭ  പ്രദേശത്തെ കൗമാരക്കാരായ മുഴുവന്‍ ആണ്‍കുട്ടികള്‍ക്കും ചൈല്‍ഡ് ലൈനിന്റെ  സഹകരണത്തോടെ ബോധവത്ക്കരണം കൗണ്‍സലിങ് ക്ലാസുകളും നടത്തും.  
ചൈല്‍ഡ് ലൈന്‍ കോഡിനേറ്റര്‍മാരായ സി.പി. സലീം, അന്‍വര്‍ കാരക്കാടന്‍ ഇ. രാജു കൃഷ്ണന്‍, രജീഷ്  ബാബു, പി. മുഹ്‌സിന്‍ പരി, റാഷിദ് തിരൂര്‍, നാവാസ് കൂരിയാട്, എം.വി. ബിനു  എന്നിവര്‍ സംസാരിച്ചു.