തോന്നിയ പോലെ ബ്ലോക്കുകള്‍ തീര്‍ത്ത് ഇസ്‌റാഈല്‍; തെക്കന്‍ ഗസ്സയില്‍ എങ്ങും പട്ടിണിയുടെ അടയാളങ്ങള്‍

ഗസ്സ: അതിക്രൂരമായ ആക്രമണങ്ങള്‍ക്കൊപ്പം തോന്നിയ പോലെ സയണിസ്റ്റ് സേന തീര്‍ക്കുന്ന ബ്ലോക്കുകള്‍. ദാഹം മാറ്റാന്‍ ഒരിറ്റു വെള്ളമോ വിശപ്പകറ്റാന്‍ ഒരു റൊട്ടിക്കഷ്ണം പോലുമോ ഇല്ലാത്ത അവസ്ഥയിലേക്കാണ് ഇസ്‌റാഈല്‍ ഗസ്സന്‍ ജനതയെ തള്ളിവിട്ടിരിക്കുന്നത്. തെക്കന്‍ ഗസ്സയിലെങ്ങും പട്ടിണിയുടെ അടയാളങ്ങളാണെന്ന് അല്‍ജസീറ റിപ്പോര്‍ട്ട് ചെയ്യുന്നു.

ഇസ്‌റാഈല്‍ ആക്രമണം തുടരുന്നതിനിടെ ഗസ്സ കടുത്ത ക്ഷാമത്തിലേക്ക് നീങ്ങുകയാണെന്ന് യു.എന്‍ സെക്രട്ടറി ജനറല്‍ അന്റോണിയോ ഗുട്ടറസും മുന്നറിയിപ്പ് നല്‍കുന്നു. ഇത് സംബന്ധിച്ച റിപ്പോര്‍ട്ട് ഗുട്ടറസ് യു.എന്‍ സുരക്ഷാസമിതിയിലെ അംഗങ്ങള്‍ക്ക് അയച്ചിട്ടുണ്ട്. അല്‍ ജസീറ അറബിക് ലേഖകന്‍ റാമി അയാരിയാണ് വാര്‍ത്ത റിപ്പോര്‍ട്ട് ചെയ്തത്.

ഗസ്സ കടുത്ത ക്ഷാമത്തിലേക്ക് നീങ്ങുകയാണെന്നാണ് റിപ്പോര്‍ട്ടില്‍ പറയുന്നത്. അഞ്ച് ലക്ഷത്തോളം ജനങ്ങള്‍ വലിയ പട്ടിണിയെ അഭിമുഖീകരിക്കുകയാണ്. ആരോഗ്യരംഗവും കടുത്ത പ്രതിസന്ധി നേരിടുന്നു. വിവിധ അഭയാര്‍ഥി ക്യാമ്പുകള്‍ ജനബാഹുല്യം മൂലം ബുദ്ധിമുട്ടുന്നു. ഇത് പകര്‍ച്ചവ്യാധികള്‍ പടരാന്‍ ഇടയാക്കുമെന്നും യു.എന്‍ സെക്രട്ടറി ജനറല്‍ മുന്നറിയിപ്പ് നല്‍കുന്നു.

പ്രദേശത്തെ മാലിന്യസംസ്‌കരണം ഫലപ്രദമായ നടക്കുന്നില്ലെന്നും യു.എന്‍ റിപ്പോര്‍ട്ടില്‍ പറയുന്നു. ടോയ്‌ലെറ്റുകളും അഴുക്കുചാലുകളും നിറഞ്ഞിരിക്കുകയാണ്. എത്രയും പെട്ടെന്ന് പ്രദേശത്ത് ഇസ്‌റാഈല്‍ വൈദ്യുതി പുനഃസ്ഥാപിക്കണം. ഇന്ധനവും മറ്റ് അവശ്യ വസ്തുക്കളും കൂടുതലായി ഗസ്സയിലേക്ക് എത്തിക്കണമെന്നും യു.എന്‍ സെക്രട്ടറി ജനറല്‍ വ്യക്തമാക്കുന്നു.

ലോകം ഇന്നോളം കണ്ടതില്‍ വെച്ച് ഏറ്റവും വലിയ ഭക്ഷ്യ അരക്ഷിതാവസ്ഥയാണ് ഗസ്സയിലേതെന്ന് യു.എന്‍ എമര്‍ജന്‍സി റിലീഫ് ചീഫ് മാര്‍ട്ടിന്‍ ഗ്രിഫ്ത്സ് പറയുന്നു. ആരോഗ്യ സംവിധാനങ്ങള്‍ക്കു നേരെയുള്ള ആക്രമണങ്ങളും അതുമൂലം പവര്‍ത്തിക്കുന്ന ആശുപത്രികള്‍ നാമമാത്രയായതും ആയിരങ്ങളുടെ മരണത്തിനിടയാക്കുന്നുവെന്നും അദ്ദേഹം ചൂണ്ടിക്കാട്ടുന്നു. മരണത്തിന്റേയും നിരാശയുടേയും ഇടമായിരിക്കുന്നു ഗസ്സയെന്നും അദ്ദേഹം ചൂണ്ടിക്കാട്ടുന്നു.