യുഎഇയിൽ ശക്തമായ മൂടൽമഞ്ഞ്; വിവിധ ഇടങ്ങളിൽ റെഡ്, യെല്ലോ അലർട്ടുകൾ

അബുദാബി: യുഎഇയിലെ കാലാവസ്ഥ പൊതുവെ ഭാഗികമായി മേഘാവൃതമായിരിക്കും. തീരപ്രദേശങ്ങളിൽ ഇന്ന് താഴ്ന്ന മേഘങ്ങൾ പ്രത്യക്ഷപ്പെടുമെന്ന് നാഷണൽ സെന്റർ ഓഫ് മെറ്റീരിയോളജി (എൻസിഎം). മൂടൽമഞ്ഞിന്റെ പശ്ചാത്തലത്തിൽ രാജ്യത്തിന്റെ പടിഞ്ഞാറൻ ഭാഗങ്ങളിൽ എൻസിഎം റെഡ്, യെല്ലോ അലർട്ടുകൾ പുറപ്പെടുവിച്ചിട്ടുണ്ട്.

ചിത്രത്തിൽ യെല്ലോ അലർട്ട് മൂടൽമഞ്ഞ് രൂപപ്പെടാൻ സാധ്യതയുള്ള പ്രദേശങ്ങൾ കാണിക്കുന്നതാണ്. അതേസമയം റെഡ് അലർട്ട് മൂടൽമഞ്ഞ് രൂപപ്പെട്ടതും ദൃശ്യപരത 1,000 മീറ്ററിൽ താഴെയായി കുറഞ്ഞതുമായ പ്രദേശങ്ങളാണ്.

വാഹനമോടിക്കുന്നവർ ജാഗ്രത പാലിക്കണമെന്നും വേഗപരിധി മാറ്റുന്നതിൽ ശ്രദ്ധ ചെലുത്തണമെന്നും അബുദാബി പൊലിസ് മുന്നറിയിപ്പ് നൽകി. റോഡരികിലെ ഇലക്ട്രോണിക് സൈൻ ബോർഡുകളിൽ വേഗപരിധി പ്രദർശിപ്പിച്ചിട്ടുണ്ട്.

അബുദാബിയിൽ 16 ഡിഗ്രി സെൽഷ്യസിലേക്കും ദുബൈയിൽ 17 ഡിഗ്രി സെൽഷ്യസിലേക്കും താപനില കുറയും. എമിറേറ്റുകളിൽ യഥാക്രമം 28 ഡിഗ്രി സെൽഷ്യസും 27 ഡിഗ്രി സെൽഷ്യസും ആയിരിക്കും ഉയർന്ന താപനില.

ചില ആന്തരിക പ്രദേശങ്ങളിൽ ഇന്ന് രാത്രിയും ബുധനാഴ്ച രാവിലെയും അന്തരീക്ഷം ഈർപ്പമുള്ളതായിരിക്കും. മൂടൽമഞ്ഞ് രൂപപ്പെടാനുള്ള സാധ്യതയുണ്ട്. പകൽ സമയത്ത് നേരിയതോ മിതമായതോ ആയ കാറ്റ് വീശും. അറേബ്യൻ ഗൾഫിലും ഒമാൻ കടലിലും കടൽ നേരിയ തോതിൽ പ്രക്ഷുബ്ധമാകും.