ഗാസ: കഴിഞ്ഞ 24 മണിക്കൂറിനിടെ ഒമ്പത് ഇസ്‌റാഈല്‍ സൈനികര്‍ കൊല്ലപ്പെട്ടെന്ന് സ്ഥിരീകരിച്ച് ഇസ്‌റാഈല്‍ സൈന്യം. കൊല്ലപ്പെട്ടവരുടെ പേരും ചിത്രങ്ങളും ഇസ്‌റാഈല്‍ മാധ്യമങ്ങള്‍ പുറത്തുവിട്ടു. ഒക്ടോബറില്‍ യുദ്ധം ആരംഭിച്ചതിനുശേഷം 514 സൈനികരെ നഷ്ടപ്പെട്ടതായി ഇസ്‌റാഈല്‍ സൈന്യം വ്യക്തമാക്കി. തിരിച്ചടി കൂടുതല്‍ ശക്തമാക്കുമെന്ന് ഹമാസും വ്യക്തമാക്കി.

ഫലസ്തീനില്‍ നിന്നുള്ള തിരിച്ചടിയില്‍ ഇതാദ്യമായാണ് ഇത്രയുമധികം സൈനികര്‍ 24 മണിക്കൂറിനുള്ളില്‍ കൊല്ലപ്പെട്ടതായി ഇസ്‌റാഈല്‍ സൈന്യം സമ്മതിക്കുന്നത്. ഹമാസില്‍ നിന്ന് വലിയ തിരിച്ചടികളാണ് ഇസ്‌റാഈല്‍ സൈന്യം നേരിടുന്നതെന്ന റിപ്പോര്‍ട്ടുകള്‍ നേരത്തെ പുറത്തുവന്നിരുന്നു.

ഒമ്പത് പേര്‍കൊല്ലപ്പെട്ടുവെന്ന് ഇസ്‌റാഈല്‍ സമ്മതിക്കുമ്പോഴും നിരവധി സൈനികരെ പരിക്കേല്‍പ്പിച്ചതായി ഹമാസ് വ്യക്തമാക്കുന്നുണ്ട്. അതെ സമയം യുദ്ധം തുടങ്ങിയതുമുതല്‍ 12000 ഇസ്‌റാഈലി സൈനികര്‍ക്ക് അംഗവൈകല്യം സംഭവിച്ചെന്നു കഴിഞ്ഞ ദിവസം മറ്റൊരു റിപ്പോര്‍ട്ട് പുറത്തുവന്നിരുന്നു.
കഴിഞ്ഞ 48 മണിക്കൂറിനിടെ 27 സൈനികര്‍ക്ക് പരിക്കേറ്റുവെന്നും, അവരില്‍ ഏഴ് പേരുടെ നില ഗുരുതരമാണെന്നും ഐ.ഡി.എഫ് പുറത്തുവിട്ട കണക്കുകള്‍ വ്യക്തമാക്കുന്നു.

24 മണിക്കൂറിനിടെ ഒമ്പത് ഇസ്‌റാഈല്‍ സൈനികര്‍ കൊല്ലപ്പെട്ടു