രണ്ട് വിഭാഗങ്ങള്‍ക്കിടയില്‍ മതസ്പര്‍ധയുണ്ടാക്കാന്‍ ശ്രമിച്ചു; തമിഴ്‌നാട് ബി.ജെ.പി അധ്യക്ഷനെതിരെ കേസ്

ധര്‍മപുരി: കത്തോലിക്ക പള്ളിയില്‍ യുവാക്കളുമായി നടത്തിയ വാക്കേറ്റത്തില്‍ ബി.ജെ.പി സംസ്ഥാന അധ്യക്ഷന്‍ കെ. അണ്ണാമലൈക്കെതിരെ കേസ്. ബിജെ.പി അധ്യക്ഷന്‍പള്ളിയില്‍ കയറുന്നത് തടഞ്ഞതിനാണ് യുവാക്കളുമായി വാക്കേറ്റമുണ്ടായത്. മതസ്പര്‍ധ ഉണ്ടാക്കാന്‍ ശ്രമം, ആരാധനാലയമുള്ള സ്ഥലത്ത് സംഘര്‍ഷ ശ്രമം, മതവൈര്യമുണ്ടാക്കാന്‍ ശ്രമം, സമാധാന അന്തരീക്ഷം തകര്‍ക്കാന്‍ ശ്രമം അടക്കമുള്ള കുറ്റങ്ങള്‍ ചുമത്തിയാണ് കേസെടുത്തിരിക്കുന്നത്. 28കാരനായ കാര്‍ത്തിക് ആണ് പരാതി നല്‍കിയത്.

'എന്‍ മണ്ണ് എന്‍ മക്കള്‍' പദയാത്രയുടെ ഭാഗമായി അണ്ണാമലൈ ക്രൈസ്തവ പള്ളികളില്‍ സന്ദര്‍ശനം നടത്തിയിരുന്നു. ഇതിന്റെ ഭാഗമായാണ് ധര്‍മപുരി ബൊമ്മിഡിയിലെ സെന്റ് ലൂര്‍ദ് പള്ളിയിലും എത്തിയത്. എന്നാല്‍, പള്ളിക്കുള്ളില്‍ ബി.ജെ.പി സംസ്ഥാന അധ്യക്ഷന്‍ കയറുന്നത് ഒരു സംഘം യുവാക്കള്‍ തടഞ്ഞു. മണിപ്പൂര്‍ സംഘര്‍ഷത്തിന് കാരണക്കാരായ ബി.ജെ.പിയുടെ നേതാക്കള്‍ പള്ളിക്കുള്ളില്‍ കയറരുതെന്ന് പറഞ്ഞാണ് ഇവര്‍ അണ്ണാമലൈയെ തടഞ്ഞത്.

അതേസമയം, മണിപ്പൂരില്‍ രണ്ട് ഗോത്രങ്ങള്‍ തമ്മിലാണ് സംഘര്‍ഷമെന്നും ക്രൈസ്തവര്‍ക്ക് ഒന്നും സംഭവിച്ചിട്ടില്ലെന്നും അണ്ണാമലൈ വിശദീകരിച്ചു. എന്നാല്‍, സംഘര്‍ഷം ഒഴിവാക്കാന്‍ സംസ്ഥാനത്തെ ബി.ജെ.പി സര്‍ക്കാര്‍ ഒന്നും ചെയ്തില്ലെന്ന് യുവാക്കള്‍ ആരോപിച്ചു.

പതിനായിരം പേരെ കൂട്ടി താന്‍ പള്ളിക്ക് മുമ്പില്‍ ധര്‍ണ നടത്തിയാല്‍ നിങ്ങള്‍ എന്ത് ചെയ്യുമെന്ന് ക്ഷുഭിതനായ അണ്ണാമലൈ മറുചോദ്യം ഉന്നയിച്ചു. ഇയാള്‍ യുവാക്കളുടെ മേല്‍ കൈവെക്കുകയും ചെയ്തു. സംഘര്‍ഷത്തെ തുടര്‍ന്ന് പൊലിസ് എത്തിയാണ് യുവാക്കളെ പിന്തിരിപ്പിക്കുകയും അണ്ണാമലൈക്ക് പള്ളിയില്‍ കയറാന്‍ അവസരമുണ്ടാക്കുകയും ചെയ്തത്.