ഇംഫാല്‍: മോദിയേയും ബി.ജെ.പിയേയും കടന്നാക്രമിച്ച് കോണ്‍ഗ്രസ് നേതാവ് രാഹുല്‍ ഗാന്ധി. പ്രധാനമന്ത്രി നരേന്ദ്ര മോദിയേയും ബി.ജെ.പിയേയും സംബന്ധിച്ച് മണിപ്പൂര്‍ ഇന്ത്യയുടെ ഭാഗമല്ലെന്ന് രാഹുല്‍ ഗാന്ധി പറഞ്ഞു. ഭാരത് ജോഡോ ന്യായ് യാത്ര ഇംഫാലില്‍ ഫ്‌ലാഗ് ഓഫ് ചെയ്തതിന് പിന്നാലെ സംസാരിക്കുകയായിരുന്നു അദ്ദേഹം.

മണിപ്പൂരിലെ ജനങ്ങള്‍ അനുഭവിച്ചുകൊണ്ടിരിക്കുന്ന വേദന തങ്ങള്‍ക്ക് മനസ്സിലാകുമെന്ന് പറഞ്ഞ രാഹുല്‍ ഗാന്ധി, സംസ്ഥാനത്ത് സമാധാനം തിരികെകൊണ്ടുവരുമെന്ന് ഉറപ്പുനല്‍കി. 'മണിപ്പൂരിലെ ജനങ്ങളുടെ നഷ്ടങ്ങളും വേദനകളും ഞങ്ങള്‍ക്ക് മനസ്സിലാകും. ഞങ്ങള്‍ ഇവിടെ എത്തിയിരിക്കുന്നത് നിങ്ങളെ കേള്‍ക്കാനാണ്. നിങ്ങളുടെ വേദന പങ്കുവെക്കാനാണ്. ഐക്യത്തിന്റേയും ഒത്തൊരുമയുടേയും പുതിയൊരു ഇന്ത്യയെക്കുറിച്ച് പറയാനാണ്. ഞങ്ങള്‍ ഉറപ്പുനല്‍കുന്നു, നിങ്ങള്‍ക്ക് നഷ്ടപ്പെട്ട, വിലപ്പെട്ടവയൊക്കെയും തിരികെ നല്‍കും. മണിപ്പൂരിലെ ഐക്യവും സമാധാനവും തിരികെ കൊണ്ടുവരും', രാഹുല്‍ ഗാന്ധി പറഞ്ഞു.

'ബി.ജെ.പിയുടെ രാഷ്ട്രീയം കാരണം മണിപ്പൂരിലെ മൂല്യമേറിയതൊക്കെയും നഷ്ടപ്പെട്ടു. പ്രധാനമന്ത്രി നരേന്ദ്ര മോദിയേയും ബി.ജെ.പിയേയും ആര്‍.എസ്.എസിനേയും സംബന്ധിച്ച് മണിപ്പൂര്‍ ഇന്ത്യയുടെ ഭാഗമല്ല. ഭരണം തകിടം മറിഞ്ഞ, ക്രമസമാധാനം തകര്‍ന്ന ഇടമാണ് മണിപ്പൂര്‍. മണിപ്പൂര്‍ വിഭജിക്കപ്പെട്ടു. എല്ലായിടത്തും വിദ്വേഷം പരത്തി. നിരവധി ജനങ്ങളുടെ ജീവന്‍ നഷ്ടപ്പെട്ടു. കണ്‍മുമ്പില്‍ വെച്ച് പ്രിയപ്പെട്ടവര്‍ ഇല്ലാതെയായി. ഇനിയും നിങ്ങളെ കൈ ചേര്‍ത്തു പിടിക്കാനോ പ്രധാനമന്ത്രി വന്നിട്ടില്ല' ഇത് ലജ്ജാകരമെന്നും രാഹുല്‍ ഗാന്ധി കൂട്ടിച്ചേര്‍ത്തു.

മോദിയേയും ബി.ജെ.പിയേയും സംബന്ധിച്ച് മണിപ്പൂര്‍ ഇന്ത്യയുടെ ഭാഗമല്ല; വേദന ഞങ്ങള്‍ക്ക് മനസിലാകും: രാഹുല്‍ ഗാന്ധി