ഭുവനേശ്വര്‍: കലിംഗ സൂപ്പര്‍ കപ്പില്‍ ബ്ലാസ്റ്റേഴ്‌സിനെ തോല്‍പിച്ച് ജംഷഡ്പൂര്‍. രണ്ടിനെതിരെ മൂന്ന് ഗോളുകള്‍ക്കാണ് തോല്‍വി. 29ാം മിനിറ്റില്‍ കേരള ബ്ലാസ്റ്റേഴ്‌സാണ് ആദ്യം ലീഡെടുത്തത്. ദിമിത്രിയോസ് ഡയമന്റികോസ് പെനാല്‍റ്റിയിലൂടെയാണ് ഗോള്‍ കണ്ടെത്തിയത്. ദിമിത്രിയോസ് കളിയില്‍ രണ്ടുഗോളുകള്‍നേടി.

പെനാല്‍റ്റി ബോക്‌സില്‍ ഡയ്‌സൂക്കെയെ വീഴ്ത്തിയതിന് ലഭിച്ച പെനാല്‍റ്റി, ജാംഷഡ്പുരിന്റെ മലയാളി ഗോള്‍കീപ്പര്‍ രഹിനേഷിന്റെ കണക്കൂകൂട്ടലുകള്‍ തെറ്റിച്ച് ഡയമന്റിക്കോസ് വലയിലാക്കി. എന്നാല്‍, ബ്ലാസ്റ്റേഴ്‌സ് ആഹ്ലാദങ്ങള്‍ക്ക് നാല് മിനിറ്റേ ആദ്യ ഗോളിന് ആയുസുണ്ടായുള്ളൂ. 33ാം മിനിറ്റില്‍ ഡാനിയല്‍ ചിമ ചുക്ക്വു ജാംഷഡ്പുരിനായി സമനില ഗോള്‍ നേടി. മുഹമ്മദ് ഉവൈസ് ബോക്‌സിലേക്ക് ഉയര്‍ത്തി നല്‍കിയ പാസ് ഉയര്‍ന്ന് ചാടി ചുക്ക്വു വലങ്കാലില്‍ കോരിയെടുത്ത് വലയിലെത്തിച്ചു.

രണ്ടാം പകുതിയില്‍ ചിമ വീണ്ടും ജംഷദ്പൂരിനായി വല കുലുക്കി. 57ആം മിനുട്ടില്‍ ആയിരുന്നു ചിമ ചുക്വുവിന്റെ ഗോള്‍. 62ആം മിനുട്ടില്‍ ബ്ലാസ്റ്റേഴ്‌സിന് വീണ്ടും ഒരു പെനാള്‍ട്ടി ലഭിച്ചു. അതും ദിമി ലക്ഷ്യത്തില്‍ എത്തിച്ചു. സ്‌കോര്‍ 2-2. 69ആം മിനുട്ടില്‍ ലെസ്‌കോവിച് ഒരു പെനാള്‍ട്ടി വഴങ്ങി. അത് മന്‍സോറോ ലക്ഷ്യത്തില്‍ എത്തിച്ചു. സ്‌കോര്‍ 3-2.

ഇതിനു ശേഷം ബ്ലാസ്റ്റേഴ്‌സ് അറ്റാക്ക് ചെയ്യാന്‍ ശ്രമിച്ചു എങ്കിലും പരാജയം ഒഴിവാക്കാന്‍ വേണ്ടിയിരുന്ന മൂന്നാം ഗോള്‍ വന്നില്ല. അവസാനം ഇഞ്ച്വറി ടൈമില്‍ ലെസ്‌കോവിചിനെ ഫൗള്‍ ചെയ്തതിന് ചിമ ചുവപ്പ് കണ്ട് പുറത്തായി. എന്നിട്ടും വിജയം ഉറപ്പിക്കാന്‍ ജംഷദ്പൂരിനായി. ഗ്രൂപ്പില്‍ രണ്ട് മത്സരങ്ങള്‍ കഴിഞ്ഞപ്പോള്‍ ജംഷദ്പൂര്‍ 6 പോയിന്റുമായി ഒന്നാമത് നില്‍ക്കുന്നു. ബ്ലാസ്റ്റേഴ്‌സ് 3 പോയിന്റുമായി രണ്ടാം സ്ഥാനത്താണ്.

സൂപ്പര്‍ കപ്പില്‍ ബ്ലാസ്റ്റേഴ്‌സിനെ തോല്‍പിച്ച് ജംഷഡ്പൂര്‍