ആഡംബര കാറുകളുടെ അവസാന വാക്കായി കണക്കാക്കപ്പെടുന്ന ബ്രാന്‍ഡാണ് റോള്‍സ് റോയ്‌സ്. ലോകത്തിലെ ഒട്ടുമിക്ക കോടീശ്വരന്മാരുടേയും പ്രിയപ്പെട്ട വാഹനമായ റോള്‍സ് റോയ്‌സ് തങ്ങളുടെ ആദ്യ ഇ.വി കാര്‍ ഇന്ത്യന്‍ മാര്‍ക്കറ്റിലേക്ക് അവതരിപ്പിക്കാനൊരുങ്ങുകയാണ്. കമ്പനിയുടെ ആദ്യ ഇ.വിയായ സ്‌പെക്ടര്‍ കഴിഞ്ഞ വര്‍ഷം കമ്പനി ലോക വിപണിയിലേക്ക് അവതരിപ്പിച്ചിരുന്നെങ്കിലും വാഹനം ഇന്ത്യയിലേക്ക് എത്തിയിരുന്നില്ല.

എന്നാല്‍ വിദേശത്ത് നിന്നും വാങ്ങി ഇന്ത്യയിലേക്ക് ഇറക്കുമതി ചെയ്ത സ്‌പെക്ടറുകള്‍ ഇന്ത്യയില്‍ ചെന്നൈയിലടക്കം നിരവധി നിരത്തുകളിലൂടെ ചീറി പായുന്നുണ്ട്.ജനുവരി 19നാണ് സ്‌പെക്ടര്‍ ഇന്ത്യന്‍ മാര്‍ക്കറ്റിലേക്ക് ഔദ്യോഗികമായി അവതരിക്കപ്പെടുന്നത്. മികച്ച ഡിസൈനില്‍ ഒരുങ്ങുന്ന വാഹനത്തില്‍ എഞ്ചിന് പകരം നാല് വീലുകളിലും ഓരോ ഇലക്ട്രിക് മോട്ടോറുകള്‍ സജ്ജീകരിച്ചിരിക്കുന്നു. ഇത് കാറിന് 430 കിലോവാട്ട് പവര്‍ നല്‍കുന്നു. 900 Nm ടോര്‍ക്ക് ശേഷിയില്‍ ഓടാന്‍ കഴിയുന്ന തരത്തിലാണ് ഈ ഇവി കൂപ്പെ രൂപകല്‍പ്പന ചെയ്തിരിക്കുന്നത്.

വെറും നാലര സെക്കന്റ് സമയം കൊണ്ട് പൂജ്യത്തില്‍ നിന്നും മണിക്കൂറില്‍ നൂറ് കിലോമീറ്ററിലേക്ക് വേഗത കൈവരിക്കാന്‍ സാധിക്കുന്ന കാറിന്
102 kWh ബാറ്ററി പായ്ക്കാണുള്ളത്. ഒറ്റത്തവണ ചാര്‍ജ് ചെയ്താല്‍ 520 കി.മീ സഞ്ചരിക്കാന്‍ കഴിയുന്ന കാറിന് ഏഴ് കോടി മുതല്‍ ഒന്‍പത് കോടി വരെയാണ് എക്‌സ്‌ഷോറൂം വില വരുന്നത്.

Content Highlights:Rolls Royce Spectre To Launch In India On January 19