വാഴക്കാട്: സ്വാതന്ത്ര്യദിനം വേറിട്ട രീതിയില്‍ ആഘോഷിച്ച് യുവാക്കള്‍ മാതൃകയായി. പാലിയേറ്റീവ് കെയറിനു വേണ്ടി ധനസമാഹരണം നടത്തിയും റോഡരികിലെ കാടുകള്‍ വെട്ടിത്തെളിച്ചുമാണ് വാട്‌സാപ് സൗഹൃദക്കൂട്ടായ്മ വ്യത്യസ്തമായത്. പണിക്കരപ്പുറായ മിനി സ്റ്റേഡിയത്തിനു സമീപം കാടുപിടിച്ച സ്ഥലമാണ് യുവാക്കള്‍ വെട്ടിത്തെളിച്ച് വൃത്തിയാക്കിയത്. തുടര്‍ന്ന് വാഹനയാത്രക്കാര്‍ക്ക് മധുരം വിതരണം ചെയ്യുകയും വാഴക്കാട് പാലിയേറ്റീവ് കെയറിനു വേണ്ടി ധനസമാഹരണം നടത്തുകയും ചെയ്തു. വൃത്തിയാക്കിയ സ്ഥലത്ത് പൂന്തോട്ടം നിര്‍മിക്കാനാണ് പദ്ധതി. പരിപാടികള്‍ക്ക് യൂസുഫ് ബഷീര്‍,ബി.പി സഫ്‌വാന്‍,അര്‍ജുന്‍,ടി.കെ സജാദ്,നസീഫ്,കെ.എം മര്‍സൂഖ്,ഫാറൂഖ്,സര്‍ഫാസ്,കെ. അനസ് എന്നിവര്‍ നേതൃത്വം നല്‍കി.