ഇലക്ട്രിക്ക് വാഹനങ്ങളുടെ മികച്ച വിപണിയിലൊന്നായ ഇന്ത്യയിലേക്ക് പുത്തന്‍ സ്‌കൂട്ടറുകളുടെ ഒരു നീണ്ട റിലീസ് തന്നെ വരാറുണ്ട്. എന്നാല്‍ വിപണിയില്‍ വാഹനം മിന്നിമറിയുന്ന വേഗതയൊന്നും പൊതുവെ ഇന്ത്യന്‍ വാഹന മാര്‍ക്കറ്റിലെ സര്‍വ്വീസ് സെന്ററുകള്‍ക്കില്ല എന്ന പരാതി വ്യാപകമാണ്. എന്നാല്‍ തങ്ങളുടെ ഉപഭോക്താക്കള്‍ക്ക് വേഗതയേറിയ സര്‍വ്വീസ് വാഗ്ധാനം ചെയ്ത് രംഗത്ത് വന്നിരിക്കുകയാണ് ഏഥര്‍ എനര്‍ജി. എക്‌സ്പ്രസ് കെയര്‍ സര്‍വ്വീസ് പ്രോഗ്രാം എന്ന പേരിലറിയപ്പെടുന്ന കെയര്‍ സര്‍വ്വീസ് പ്രോഗ്രാം വഴി വെറും 60 മിനിറ്റ് കൊണ്ട് വാഹനങ്ങള്‍ സര്‍വീസ് ചെയ്ത് ഉപഭോക്താക്കള്‍ക്ക് തിരികെ നല്‍കുമെന്നാണ് കമ്പനി പറയുന്നത്. എന്നാല്‍ സര്‍വ്വീസിലെ വേഗത, സര്‍വ്വീസ് ചെയ്യുന്നതിലെ ഗുണമേന്മയെ ബാധിക്കില്ല എന്നും കമ്പനി ഉറപ്പ് നല്‍കുന്നുണ്ട്.

ആദ്യഘട്ടത്തില്‍ രാജ്യത്തെ 11 പ്രധാന നഗരങ്ങളിലായി 20 എക്‌സ്പ്രസ് കെയര്‍ സെന്ററുകള്‍ ആരംഭിച്ചിട്ടുണ്ട്. ഈ വര്‍ഷം മാര്‍ച്ചോടെ എക്‌സ്പ്രസ് കെയര്‍ സര്‍വീസ് സെന്ററുകളുടെ എണ്ണം 50 ആയി ഉയര്‍ത്താനാണ് കമ്പനി ആലോചിക്കുന്നത്. സര്‍വ്വീസിന്റെ വേഗത വര്‍ദ്ധിപ്പിക്കുന്നതിനായി ഒാരോ എക്‌സ്പ്രസ് സര്‍വ്വീസ് സെന്ററിലും രണ്ട് വിദഗ്ധരായ ടെക്‌നീഷ്യന്‍മാരെയും കമ്പനി നിയമിക്കുന്നുണ്ട്. കൂടാതെഉപഭോക്താക്കളുടെ സൗകര്യത്തിനും കാലതാമസം ഒഴിവാക്കാനുമായി സര്‍വീസ് ബേ മുന്‍കൂട്ടി ബുക്ക് ചെയ്യാനുള്ള സൗകര്യവും കമ്പനി ഒരുക്കുന്നുണ്ട്.

125 മുതല്‍ 150 രൂപ വരെ മുടക്കിയാല്‍ ഈ സേവനം ലഭ്യമാക്കാം. നിലവില്‍ ട്രയല്‍ റണ്‍ അടിസ്ഥാനത്തില്‍ ആരംഭിച്ച പരിപാടിക്ക് ഏഥര്‍ ഉപഭോക്താക്കള്‍ക്കിടയില്‍ നിന്ന് മികച്ച പ്രതികരണമാണ് ലഭിച്ചുകൊണ്ടിരിക്കുന്നത്. നിലവില്‍ മൂന്ന് മോഡലുകള്‍ വിപണിയിലേക്ക് അവതരിപ്പിച്ചിരിക്കുന്ന ഏഥറിന് മാര്‍ക്കറ്റില്‍ ആധിപത്യം സ്ഥാപിക്കാനായി കൂടുതല്‍ മോഡലുകള്‍ വിപണിയിലേക്കെത്തിക്കാന്‍ പദ്ധതികളുണ്ടെന്ന റിപ്പോര്‍ട്ടുകള്‍ പുറത്ത് വരുന്നുണ്ട്.

Content Highlights:ather energy launches express care service program