കുഞ്ഞുങ്ങള്‍ ഉള്ള വീട്ടുകാരുടെ ഏറ്റവും വലിയ ടാസ്‌ക്കുകളിലൊന്നാണ് ഡയപ്പര്‍ ഡിസ്‌പോസ് ചെയ്യല്‍. ഇരുട്ടിന്റെ മറവില്‍ ആള്‍സഞ്ചാരമില്ലാത്ത വഴിയോരങ്ങളില്‍ കൊണ്ടുപോയി ഉപേക്ഷിക്കുന്നവരുണ്ട്. എന്നാല്‍ അങ്ങനെ ചെയ്യുന്നതിന്റെ ഭവിഷ്യത്ത് വളരെ വലുതാണ്. പ്ലാസ്റ്റിക് മണ്ണുമായി ലയിച്ച് ചേരാന്‍ വര്‍ഷങ്ങള്‍ എടുത്തേക്കാം. ഇത് പ്രകൃതിക്ക് വളരെയധികം ദോഷകരമാണ്, കൂടാതെ കൃത്യമായി മാലിന്യ സംസ്‌കരണം നടത്താതെ തുറന്ന സ്ഥലങ്ങളില്‍ ഉപേക്ഷിച്ചാല്‍ അതില്‍ നിന്നുണ്ടാവുന്ന ബാക്ടീരിയകള്‍ വളരെ അപകടകാരികളാണ്. ആ ബാക്റ്റീരിയകള്‍ പടര്‍ന്നു പിടിക്കുന്നതിലൂടെ മാരകമായ അസുഖങ്ങള്‍ വന്നേക്കാം.

ഡയപ്പറുകള്‍ ഭൂമിക്ക് ഉണ്ടാക്കുന്ന പ്രശ്‌നത്തെക്കുറിച്ച് കൂടുതല്‍ അവബോധം ലഭിച്ചു തുടങ്ങിയതോടെ പരിസ്ഥിതി സൗഹൃദപരവും സംസ്‌കരണം നടത്താന്‍ തരത്തിലുമുള്ള ഡയപ്പറുകള്‍ വിപണിയിലെത്തി തുടങ്ങിയിട്ടുണ്ട്. ലഭ്യമെങ്കില്‍ അത് വാങ്ങി ഉപയോഗിക്കാന്‍ ശ്രമിക്കുക.

ഡയപ്പറുകള്‍ ഡിസ്‌പോസ് ചെയ്യുന്ന വിധം

ഡിസ്‌പോസിബിള്‍ ആയ സാധാരണ പാമ്പേഴ്‌സ് അടക്കമുള്ള ഡയപ്പറുകള്‍ ഒരിക്കലും മൊത്തത്തില്‍ കത്തിക്കരുത്. ഡിസ്‌പോസിബിള്‍ ഇനത്തില്‍ ധാരാളം കെമിക്കല്‍ ഉത്പന്നങ്ങള്‍ ഉണ്ട്. കത്തിക്കുമ്പോള്‍ ഇവ ഡയോക്‌സിനുകള്‍ പുറന്തള്ളുന്നു. എത്ര കത്തിക്കാന്‍ ശ്രമിച്ചാലും പൂര്‍ണമായും ഇവ കത്തുകയില്ല. ഡയപ്പറിനുള്ളിലെ ജെല്ലാണ് ഇതിനു കാരണം. ഉപയോഗിച്ച് ഡയപ്പേഴ്‌സിലെ മാലിന്യങ്ങള്‍ ആദ്യം നീക്കി കളയുക, ശേഷം അതിന്റെ പാളി കീറി ജെല്ല് ഉപയോഗശൂന്യമായ പാത്രത്തില്‍ നിക്ഷേപിക്കുക. ജെല്ലിന്റെ അളവിന് അനുസരിച്ച് ഉപ്പ് ഇടുക. അല്പനേരം വെച്ച ശേഷം അത് വെള്ളമായി മാറിയിട്ടുണ്ടാകും. ഇത് പിന്നീട് എവിടെയെങ്കിലും ഒഴിച്ചു കളയാവുന്നതാണ്. ശേഷം ബാക്കി ഡയപ്പര്‍ അവശിഷ്ടങ്ങള്‍ കഴുകി ഉണക്കി കത്തിക്കാവുന്നതാണ്. ഡയപ്പറുകള്‍ ഒരു കാരണവശാലും റീസൈക്കിള്‍ ബിന്നുകളില്‍ നിക്ഷേപിക്കരുത്. കാരണം ഡിസ്‌പോസിബിള്‍ ഡയപ്പറുകള്‍ റീസൈക്കിള്‍ ചെയ്യാന്‍ സാധിക്കുന്നവയല്ല.

ഡയപ്പറുകള്‍ ഉപയോഗിച്ച് കമ്പോസ്റ്റും ഉണ്ടാക്കാം:

ഡയപ്പറുകളുടെ ഉള്ളില്‍ ഈര്‍പ്പം തങ്ങി നില്ക്കാന്‍ സഹായിക്കുന്ന പോളിക്രിലെറ്റ് ക്രിസ്റ്റലുകളെയാണ് യൂറോപ്പില്‍ കമ്പോസ്റ്റ് നിര്‍മ്മിക്കാനായി ഉപയോഗിക്കുന്നത്. ഈ മാര്‍ഗം നമുക്കും പരീക്ഷിക്കാവുന്നതാണ്. ഭക്ഷണം ഉത്പാദിപ്പിക്കുന്ന വിളകള്‍ക്കോ ഫല വര്‍ഗ്ഗങ്ങള്‍ ഉണ്ടാകുന്ന ചെടികള്‍ക്കോ ഈ കമ്പോസ്റ്റ് ഉപയോഗിക്കരുത്. പൂച്ചെടികള്‍, മരങ്ങള്‍, പുല്‍ത്തകിടികള്‍ എന്നിവക്കുള്ള കമ്പോസ്റ്റ് ആയി ഇവ ഉപയോഗിക്കാവുന്നതാണ്.