റിയാദ്: സമസ്ത നൂറാം വാര്‍ഷിക പ്രഖ്യാപന സമ്മേളനത്തിനായി എസ്ഐസി സഊദി നാഷണല്‍ കമ്മിറ്റി നേതാക്കള്‍ ബംഗളൂരുവിലെത്തി. സമസ്ത ഇസ്‌ലാമിക് സെന്റര്‍ സഊദി നാഷണല്‍ കമ്മിറ്റി പ്രസിഡന്റ് സയ്യിദ് ഉബൈദുല്ല തങ്ങള്‍ അല്‍ ഐദ്രൂസി മേലാറ്റൂര്‍, ട്രഷറര്‍ ഇബ്രാഹിം ഓമശ്ശേരി എന്നിവരുടെ നേതൃത്വത്തിലാണ് എസ്.ഐ.സി സഊദി സംഘമെത്തിയത്. കർണ്ണാടകയിലെത്തിയ സഊദി സംഘത്തെ എസ്.കെ.എസ്.എസ്.എഫ് കര്‍ണാടക സ്റ്റേറ്റ് കമ്മിറ്റി ഭാരവാഹികള്‍ സ്വീകരിച്ചു.

സഊദി ഈസ്റ്റേണ്‍ പ്രവിശ്യയില്‍ നിന്ന് സകരിയ ഫൈസി, നൂറുദ്ദീന്‍ മൗലവി, ഇബ്രാഹിം ഓമശ്ശേരി (ദമാം), സുലൈമാന്‍ ഖാസിമി, അബ്ദുല്‍ റസാഖ് ഫൈസി, അബൂബക്കര്‍ ദാരിമി താമരശ്ശേരി (ജുബൈല്‍), അഹമ്മദ് അലി, നുഹ് മാന്‍, അയ്യൂബ് ബ്ലാത്തൂര്‍ (അല്‍ഹസ), സയ്യിദ് സൈനുല്‍ ആബിദ് തങ്ങള്‍, മുസ്തഫ ഇസ്മായില്‍ (അല്‍ഖോബാര്‍) എന്നിവരും സമ്മേളനത്തിനായി സഊദിയില്‍നിന്ന് പുറപ്പെട്ടു.

സയ്യിദ് ഉബൈദുല്ല തങ്ങള്‍, മുജീബ് റഹ് മാനി, സൈനുദ്ധീന്‍ ഫൈസി പൊന്മള തുടങ്ങിയ എസ്.ഐ.സി നേതാക്കള്‍ ജിദ്ദയില്‍
നിന്ന് ബംഗളൂരുവിലേക്ക് യാത്ര തിരിച്ചു. സമസ്ത സമ്മേളന നഗരിയായ ബംഗളൂരു പാലസ് മൈതാനിയില്‍ ഇന്ന് നടക്കുന്ന മജ്ലിസുന്നൂര്‍, 2500 വിഖായ വളണ്ടിയര്‍മാരുടെ സമര്‍പ്പണം പരിപാടികളില്‍ എസ്.ഐ.സി നേതാക്കള്‍ സംബന്ധിക്കും.

സമസ്തയുടെ പതിമൂന്നാമത് പോഷക സംഘടനയായ എസ്.ഐ.സി സഊദി നാഷണല്‍ കമ്മിറ്റിക്കുള്ള അംഗീകാരമായാണ്
ബംഗളൂരുവിലെ സമസ്ത സമ്മേളനത്തിലേക്ക് സഊദി നേതാക്കള്‍ക്കുള്ള ക്ഷണമെന്നും, സമസ്തയുടെ വിദ്യാഭ്യാസ സാംസ്‌കാരിക പ്രവര്‍ത്തനം കേരളത്തിനു പുറത്തേക്കു കൂടി വ്യാപിപ്പിക്കുന്നതിനുള്ള തുടക്കമാണിതെന്നും സൗദി നാഷണല്‍ കമ്മിറ്റി പ്രസിഡന്റ് സയ്യിദ് ഉബൈദുല്ല തങ്ങള്‍ പറഞ്ഞു.