ബംഗളുരു: ഇസ്‌ലാമിക പ്രബോധന രംഗത്ത് കേരളീയ സംഘബോധമൊരുക്കിയ സമസ്തയുടെ ശതാബ്ദി ആഘോഷത്തിന് നാളെ ബംഗളുരുവില്‍ തുടക്കമാവും.ആദര്‍ശ വിശുദ്ധിയുടെ തൂവെള്ള പ്രഭ ചൊരിഞ്ഞ പണ്ഡിത പ്രസ്ഥാനത്തിന്റെ ചരിത്ര സമ്മേളനത്തിന് സാക്ഷിയാവാന്‍ ജനലക്ഷങ്ങള്‍ ഒഴുകിയെത്തും.നാളെ വൈകീട്ട് അഞ്ചിന് ബംഗളുരു പാലസ് മൈതാനത്തെ ശംസുല്‍ ഉലമാ നഗരിയില്‍ നടക്കുന്ന സമ്മേളനം ദേശീയ രംഗത്ത് സമസ്തയുടെ മുന്നേറ്റങ്ങളുടെ പ്രഖ്യാപനം കൂടിയാവും. 2016 ഫെബ്രുവരിയില്‍ നടന്ന ആലപ്പുഴ സമ്മേളനത്തിലാണ് പാണക്കാട് സയ്യിദ് ഹൈദരലി ശിഹാബ് തങ്ങള്‍ നൂറാം വാര്‍ഷിക പ്രഖ്യാപനം നടത്തിയത്.

സമ്മേളന പരിപാടികള്‍ക്ക് തുടക്കം കുറിച്ച് നാളെ രാവിലെ ഒന്‍പതിന് തവക്കല്‍ മസ്താന്‍ ദര്‍ഗ സിയാറത്ത് നടക്കും. സമസ്ത ഉപാധ്യക്ഷന്‍ യു.എം. അബ്ദു റഹ്മാന്‍ മുസിയാര്‍ നേതൃത്വം നല്‍കും. തുടര്‍ന്ന് രാവിലെ പത്തിന്
സമ്മേളന നഗരിയില്‍ സ്വാഗതസംഘം ജനറല്‍ കണ്‍വീനര്‍ കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി പതാക ഉയര്‍ത്തും.

വൈകുന്നേരം അഞ്ചിന് പൊതു സമ്മേളനം ആരംഭിക്കും. സമസ്ത മുശാവറ അംഗം മാണിയൂര്‍ അഹ്മദ് മുസ്ലിയാര്‍ പ്രാര്‍ഥനക്ക് നേതൃത്വം നല്‍കും. സമസ്ത കേരളാ ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷത വഹിക്കും. കര്‍ണാടക മുഖ്യമന്ത്രി സിദ്ധരാമയ്യ ഉദ്ഘാടനം ചെയ്യും. പാണക്കാട് സയ്യിദ് സാദിഖലി ശിഹാബ് തങ്ങള്‍ മുഖ്യപ്രഭാഷണം നടത്തും.

സമസ്ത കേരള ജംഇയ്യത്തുല്‍ ഉലമാ ജനറല്‍സെക്രട്ടറി പ്രൊഫ. കെ ആലിക്കുട്ടി മുസ്ലിയാര്‍ സമസ്ത നൂറാം വാര്‍ഷിക പദ്ധതി പ്രഖ്യാപനം നടത്തും. കര്‍ണാടക ഉപമുഖ്യമന്ത്രി ഡി.കെ ശിവകുമാര്‍ മുഖ്യാതിഥിയാകും. സ്വാഗത സംഘം ചെയര്‍മാന്‍ എം.ടി അബ്ദുല്ല മുസ്ലിയാര്‍ സ്വാഗത പ്രഭാഷണം നിര്‍വഹിക്കും. സമസ്ത കേരള ജംഇയ്യത്തുല്‍ ഉലമാ കേന്ദ്ര മുശാവറ അംഗം ബി.കെ അബ്ദുല്‍ ഖാദിര്‍ മുസ്ലിയാര്‍ ബംബ്രാണ ആമുഖ പ്രഭാഷണം നടത്തും. സമസ്ത കേരള ജംഇയ്യത്തുല്‍ ഉലമാ ട്രഷറര്‍ പി.പി ഉമര്‍ മുസ്ലിയാര്‍ കൊയ്യോട് പ്രഭാഷണം നടത്തും.

കര്‍ണാടക സ്പീക്കര്‍ യു.ടി ഖാദര്‍ ഫരീദ്, ആഭ്യന്തര മന്ത്രി ജി. പരമേശ്വര, ഊര്‍ജ വകുപ്പ് മന്ത്രി കെ.ജെ ജോര്‍ജ്, ഗതാഗത വകുപ്പ് മന്ത്രി രാമലിംഗ റെഡി,വഖ്ഫ് ന്യൂനപക്ഷ വകുപ്പ് മന്ത്രി സമീര്‍ അഹമ്മദ് ഖാന്‍, ആരോഗ്യ മന്ത്രി ദിനേശ് ഗുണ്ടു റാവു, ഹജ്ജ് വകുപ്പ് മന്ത്രി റഹീം ഖാന്‍,
കര്‍ണാടക നിയമസഭാ ചീഫ് വിപ്പ് സലീം അഹമ്മദ്, കേരളാ നിയമസഭ പ്രതിപക്ഷ നേതാവ് പി.കെ കുഞ്ഞാലിക്കുട്ടി, എല്‍.എ ഹാരിസ് എം.എല്‍.എ, റിസ്‌വാന്‍ അര്‍ശദ് എം. എല്‍.എ, പൊന്നണ്ണ എം.എല്‍.എ, ഡോ. മന്തര്‍ ഗൗഡ എം.എല്‍.എ,നസീര്‍ അഹ്മദ് എം.എല്‍.സി, എന്‍. എ മുഹമ്മദ് എന്നിവര്‍ വിശിഷ്ടാതിഥികളാകും. സമസ്ത ട്രഷറര്‍ പി.പി ഉമര്‍ മുസ്‌ലിയാര്‍ കൊയ്യോട് പ്രഭാഷണം നടത്തും.

സമസ്ത ശതാബ്ദി ആഘോഷം: സമ്മേളനം നാളെ വൈകിട്ട് അഞ്ചിന്