പേയ്ടിഎമ്മിനെതിരെ നടപടി കടുപ്പിച്ച് റിസർവ് ബാങ്ക്; ഫെബ്രുവരി 29 ന് ശേഷം വിവിധ സേവനങ്ങൾക്ക് വിലക്ക്

ന്യൂഡൽഹി: ചട്ടലംഘനം ചൂണ്ടിക്കാട്ടി പേയ്ടിഎം പേയ്മെന്റ്സ് ബാങ്കിനെതിരെ വീണ്ടും നടപടിയെടുത്തത് റിസർവ് ബാങ്ക്. പേയ്ടിഎം ബാങ്കിന്റെ സേവിങ്സ്/കറന്റ് അക്കൗണ്ടുകൾ, വോലറ്റുകൾ, ഫാസ്ടാഗ്, നാഷനൽ കോമൺ മൊബിലിറ്റി കാർഡ് എന്നിവ മരവിപ്പിച്ചാണ് റിസർവ് ബാങ്കിന്റെ നടപടി. ഫെബ്രുവരി 29ന് ശേഷം ഇവയിൽ പണം നിക്ഷേപിക്കാനാകില്ല.

എന്നാൽ, ഫെബ്രുവരി 29 വരെ അക്കൗണ്ടിലെത്തുന്ന തുക പിന്നീട് എപ്പോൾ വേണമെങ്കിലും പിൻവലിക്കുന്നതിനോ ഓൺലൈൻ ഇടപാടുകൾക്ക് ഉപയോഗിക്കുന്നതിനോ തടസ്സമില്ല. എന്നാൽ, ബാലൻസ് തുക തീർന്നാൽ പിന്നീട് ഈ സേവനം ഉപയോഗിക്കാനാവില്ല. 29ന് ശേഷം പേയ്ടിഎം ബാങ്ക് അക്കൗണ്ടുകളിലേക്ക് മറ്റുള്ളവർക്കും പണമയയ്ക്കാനാകില്ല. എന്നാൽ അക്കൗണ്ടിലും വോലറ്റിലുമുള്ള തുകയുടെ പലിശ, ക്യാഷ്ബാക്ക്, റീഫണ്ട് തുടങ്ങിയവ ലഭിക്കുന്നതിനു തടസ്സമില്ല.

ഉദാഹരണത്തിന്, നിങ്ങൾ പേയ്ടിഎം ഫാസ്ടാഗ് ഉപയോഗിക്കുന്നവരാണെങ്കിൽ ഫെബ്രുവരി 29ന് ശേഷം അത് ഉപയോഗിക്കാനാവില്ല. എന്നാൽ അതിൽ പണം ബാക്കി ഉണ്ടെങ്കിൽ ഫെബ്രുവരി 29 കഴിഞ്ഞ് പണം തീരുന്നത് വരെ ഉപയോഗിക്കാം. എന്നാൽ വീണ്ടും റീചാർജ് ചെയ്യാൻ പറ്റില്ല. അതിൽ മിച്ചമുള്ള തുക മാത്രമേ ഉപയോഗിക്കാനാകൂ. തുക തീർന്നാൽ ഈ ഫാസ്ടാഗ് ഉപേക്ഷിച്ച് പുതിയ കമ്പനിയുടെ ഫാസ്ടാഗ് സ്റ്റിക്കർ വാഹനത്തിൽ പതിക്കേണ്ടി വന്നേക്കാം. അതേസമയം, ഇക്കാര്യത്തിൽ ഇനിയും വ്യക്തത വരേണ്ടതുണ്ട്.

എന്നാൽ, പേയ്ടിഎം നൽകുന്ന യുപിഐ സേവനത്തെ നിലവിൽ ബാധിച്ചിട്ടില്ല എന്നാണ് വിവരം. മറ്റൊരു ബാങ്കിങ് സേവനവും ഫെബ്രുവരി 29നു ശേഷം പേയ്ടിഎം പേയ്മെന്റ്സ് ബാങ്കിനു നൽകാനാവില്ല.