ദോഹ: മലയാള സിനിമയ്ക്ക് മലബാരിയന്‍ മതസൗഹാര്‍ദ്ദത്തിന്റെ നനുത്ത മുഖം കാണിച്ചുകൊടുത്ത ടി എ റസാഖിന് അനുശോചനം രേഖപ്പെടുത്താന്‍ അവര്‍ ഒത്തുകൂടി. ഔപചാരികതകളുടെ ആവരണങ്ങളൊന്നുമില്ലാതിരുന്ന ഈ കൂട്ടം കെ.എം.സി.സി ഹാളില്‍ ഒത്തുചേര്‍ന്നപ്പോള്‍ മലയാളത്തിന്റെ പ്രിയപ്പെട്ട തിരക്കഥാകൃത്തിനെ ഓര്‍ത്തെടുക്കാന്‍ ദോഹയിലെ സഹൃദയരും എത്തിച്ചേര്‍ന്നു.

കൊണ്ടോട്ടിക്കാര്‍ തങ്ങളുടെ പ്രിയപ്പെട്ട നാട്ടുകാരന്‍ 'കുഞ്ഞാപ്പു'വിനെ കുറിച്ച് വാതോരാതെ സംസാരിച്ചപ്പോള്‍ മലയാള സിനിമാ പ്രേമികള്‍ റസാഖെന്ന തിരക്കഥാ കൃത്തിനേയും രചയിതാവിനേയും കുറിച്ചാണ് പറഞ്ഞത്. വേറെ ചിലര്‍ക്ക് റസാഖെന്ന മനുഷ്യ സ്‌നേഹിയോടൊപ്പം കൂടിയിരുന്ന നിമിഷങ്ങളായിരുന്നു പങ്കുവെക്കാനുണ്ടായിരുന്നത്.  

അബ്ദുറഹൂഫ് തുറക്കല്‍, അര്‍ഷദ് തുറക്കല്‍, കോയ കൊണ്ടോട്ടി എന്നിവര്‍ ടി എ റസാഖ് അനുശോചന യോഗത്തിന് നേതൃത്വം നല്‍കി.  നാടക പ്രവര്‍ത്തന കാലം മുതലുള്ള സുഹൃത്ത് ഷാഫി കൊണ്ടോട്ടി, എം.ടി നിലമ്പൂര്‍, ആര്‍.പി ഹാരിസ് എന്നിവരും റസാഖിന്റെ നല്ല സിനിമകളുടെ ആസ്വാദക പക്ഷത്തിന്റെ പങ്കുവെക്കലുകളുമായി ഇഖ്ബാല്‍ ചേറ്റുവ, കിഷന്‍ജി, സുനില്‍ മാതൂര്‍,  റഫീഖ് മേച്ചേരി, വിപിന്‍ദാസ്, രാമചന്ദ്രന്‍ വെട്ടിക്കാട്ട് തുടങ്ങിയവരും സംസാരിച്ചു. നൗഫല്‍ തുറക്കല്‍ ചടങ്ങിന് നന്ദി പറഞ്ഞു.