തൊടുപുഴ: 49ാമത് സംസ്ഥാന ഷൂട്ടിങ് ചാംപ്യന്‍ഷിപ്പിന് ഇന്നു തൊടുപുഴ മുട്ടം ഷൂട്ടിങ് റേഞ്ചില്‍ തുടക്കമാവും. 21 വരെയാണ് മത്സരം. ഇടുക്കി ജില്ലാ റൈഫിള്‍ അസോസിയേഷനാണ് ചാംപ്യന്‍ഷിപ്പിന് ആതിഥ്യമരുളുന്നത്. റൈഫിള്‍, പിസ്റ്റള്‍ ഇനങ്ങളിലാണ് മത്സരങ്ങള്‍. നാലു ദിവസം നീളുന്ന ചാംപ്യന്‍ഷിപ്പില്‍ 61 ഇനങ്ങളില്‍ മത്സരമുണ്ടാവും. സംസ്ഥാന ചാംപ്യന്‍ഷിപ്പില്‍ യോഗ്യത നേടുന്നവര്‍ക്ക് മാത്രമേ ദേശീയ ചാംപ്യന്‍ഷിപ്പുകളില്‍ പങ്കെടുക്കാന്‍ കഴിയൂ. വ്യക്തിഗത ചാംപ്യന്‍ഷിപ്പ് നേടുന്നവര്‍ക്ക് എവര്‍റോളിങ് ട്രോഫിയും കാഷ് അവാര്‍ഡും സമ്മാനിക്കും.

ഇന്നു രാവിലെ 10.30നു പി ജെ ജോസഫ് എം.എല്‍.എ ചാംപ്യന്‍ഷിപ്പ് ഉദ്ഘാടനം ചെയ്യും. ജില്ലാ കലക്ടര്‍ ജി.ആര്‍ ഗോകുല്‍ അധ്യക്ഷനാവും. അഡ്വ. ജോയ്‌സ് ജോര്‍ജ് എം.പി മുഖ്യപ്രഭാഷണം നടത്തും. സംസ്ഥാന റൈഫിള്‍ അസോസിയേഷന്‍ പ്രസിഡന്റും പൊലിസ് ഹെഡ്ക്വാര്‍ട്ടേഴ്‌സ് ഐ.ജിയുമായ സുരേഷ് രാജ് പുരോഹിത് മുഖ്യാതിഥിയാവും. മത്സരങ്ങള്‍ ഇടുക്കി ജില്ലാ പൊലിസ് മേധാവി എ.വി ജോര്‍ജ് ഉദ്ഘാടനം ചെയ്യും.