കൊളംബോ: ആസ്‌ത്രേലിയക്കെതിരായ ടെസ്റ്റ് പരമ്പര ശ്രീലങ്ക 3-0ന് തൂത്തുവാരി. സ്പിന്നര്‍ രംഗണ ഹെറാത്തിന്റെ ഏഴു വിക്കറ്റ് പ്രകടനത്തില്‍ ആസ്‌ത്രേലിയയെ രണ്ടാമിന്നിങ്‌സില്‍ 160 റണ്‍സിന് പുറത്താക്കിയ ലങ്ക 163 റണ്‍സിന്റെ ജയമാണ് സ്വന്തമാക്കിയത്.

എട്ടു വിക്കറ്റിന് 312 എന്ന നിലയില്‍ അഞ്ചാം ദിനം ബാറ്റിങ് പുനരാരംഭിച്ച ലങ്ക 35 റണ്‍സ് കൂടി ചേര്‍ത്ത് രണ്ടാമിന്നിങ്‌സ് ഡിക്ലയര്‍ ചെയ്തു. 324 റണ്‍സിന്റെ വിജയ ലക്ഷ്യമാണ് ലങ്ക മുന്നോട്ടുവച്ചത്. എന്നാല്‍ ഹെറാത്തിന്റെ സ്പിന്‍ മാജിക്കിനു മുന്നില്‍ ആസ്‌ത്രേലിയ്ക്ക് പിടിച്ചു നില്‍ക്കാനായില്ല. ഡേവിഡ് വാര്‍ണര്‍(68) മാത്രമാണ് ഭേദപ്പെട്ട പ്രകടനം നടത്തിയത്. ഹെറാത്താണ് പരമ്പരയിലെയും മത്സരത്തിലെയും താരം.