ബേലൂര്‍ മഗ്‌ന ദൗത്യം നാലാം ദിനത്തിലേക്ക്; കൊലയാനക്കൊപ്പം മറ്റൊരു ആനയും

മാനന്തവാടി: കൊലയാളി കാട്ടാന ബേലൂര്‍ മഗ്‌നയെ മയക്കുവെടി വെച്ച് പിടികൂടാനുള്ള ദൗത്യസംഘത്തിന്റെ ശ്രമം നാലാം ദിവസത്തിലേക്ക്. ചൊവ്വാഴ്ച ആനയെ വയലിലേക്ക് ഇറക്കി മയക്കുവെടി വെക്കാന്‍ ശ്രമം നടത്തിയെങ്കിലും സാധിച്ചിരുന്നില്ല.

തോല്‍പ്പെട്ടി വന്യജീവി സങ്കേതത്തിലെ ജനവാസ കേന്ദ്രത്തോട് ചേര്‍ന്ന മണ്ണുണ്ടി കോളനിക്ക് സമീപമായിരുന്നു ആന നിലയുറപ്പിച്ചത്. ചൊവ്വാഴ്ച പുലര്‍ച്ച രണ്ടു കിലോ മീറ്റര്‍ ദൂരെ തോല്‍പ്പെട്ടി റോഡിലെ ഇരുമ്പുപാലത്തേക്ക് നീങ്ങിയതായി സിഗ്‌നല്‍ ലഭിച്ചു. തുടര്‍ന്ന് ദൗത്യസംഘം രാവിലെ ഏഴരയോടെ ഈ പ്രദേശത്തേക്ക് നീങ്ങി നിരീക്ഷണം തുടങ്ങി.

എന്നാല്‍, കാട്ടാനക്കൊപ്പം മറ്റൊരു ആനകൂടി ചേര്‍ന്നതോടെ ഇരുവരും ചേമ്പുംകൊല്ലി ഭാഗത്തേക്ക് നീങ്ങി. അവിടെനിന്ന് തുരത്താന്‍ ശ്രമം തുടങ്ങിയതോടെ ഉച്ചക്ക് രണ്ടരയോടെ വീണ്ടും മണ്ണുണ്ടി ഭാഗത്തേക്ക് നീങ്ങി. തിരിച്ച് ഇരുമ്പുപാലത്തേക്ക് നീങ്ങിയ ആനയെ വൈകുന്നേരം ആറ് മണിയോടെ അവിടെ വയലിലേക്ക് ഇറക്കി മയക്കുവെടി വെക്കാന്‍ ശ്രമിക്കുന്നതിനിടെ ഉള്‍ക്കാട്ടില്‍ മറഞ്ഞു. ഇതോടെ ഇന്നലത്തെ ദൗത്യം അവസാനിപ്പിക്കുകയായിരുന്നു.

ഇന്ന് ആനെയ ട്രാക്ക് ചെയ്യാനുള്ള സംഘം വനാതിര്‍ത്തിയിലേക്ക് തിരിച്ചിട്ടുണ്ട്. ഇവര്‍ നല്‍കുന്ന റേഡിയോ കോളര്‍ വിവരങ്ങള്‍ വിലയിരുത്തി മയക്കുവെടി വെക്കാനുള്ള ആര്‍.ആര്‍.ടി വെറ്റിനറി സംഘാംഗങ്ങള്‍ കാടുകയറും. ആന മണ്ണുണ്ടി വനമേഖലയില്‍ നിന്ന് ബാവലി ഭാഗത്തേക്ക് നീങ്ങിയതായാണ് വിവരം.

കഴിഞ്ഞ ശനിയാഴ്ചയാണ് പടമല ചാലിഗദ്ധ പനച്ചിയില്‍ അജീഷിനെ കാട്ടാന ചവിട്ടിക്കൊന്നത്. ഇതിനെതുടര്‍ന്ന് അപകടകാരിയായ കാട്ടാനയെ മയക്കുവെടിവെച്ച് പിടികൂടാന്‍ ഞായറാഴ്ച മുതല്‍ ശ്രമം നടന്നുവരികയാണെങ്കിലും വിജയിച്ചില്ല. ഉത്തരമേഖല സി.സി.എഫ് കെ.എസ്. ദീപ, വൈല്‍ഡ് ലൈഫ് സി.സി.എഫ് മുഹമ്മദ് ഷബാബ് എന്നിവരുടെ നേതൃത്വത്തില്‍ ഇരുന്നൂറോളം വനപാലകരും മറ്റുമാണ് പ്രവര്‍ത്തനം ഏകോപിപ്പിക്കുന്നത്.