കാസര്‍കോട്: ജില്ലയിലെ എന്‍ഡോസള്‍ഫാന്‍ ഇരകളായ കുട്ടികളുടെ അവസ്ഥ സംബന്ധിച്ച് സംസ്ഥാന ബാലാവകാശ കമ്മിഷന്‍ കലക്ടറേറ്റ് മിനി കോണ്‍ഫറന്‍സ് ഹാളില്‍ സിറ്റിങ് നടത്തി.  18 വയസ്സിനു താഴെയുള്ളവരാണ് ബാലാവകാശ കമ്മിഷന്‍ പരിധിയില്‍ ഉള്‍പ്പെടുന്നതെങ്കിലും ജില്ലയിലെ എന്‍ഡോസള്‍ഫാന്‍ ദുരിതബാധിതരുടെ പ്രത്യേക അവസ്ഥ പരിഗണിച്ച് എല്ലാവരുടെയും പരാതികള്‍ ഉള്‍ക്കൊള്ളുന്നതായി കമ്മിഷന്‍ ചെയര്‍പേഴ്‌സണ്‍ ശോഭകോശി പറഞ്ഞു. എന്‍ഡോസള്‍ഫാന്‍ ദുരിതബാധിതരുടെ പ്രശ്‌നത്തില്‍ കൂട്ടായ സമാശ്വാസ നടപടികളാണ് ഉണ്ടാകേണ്ടതെന്നും വ്യത്യസ്ത വീക്ഷണമുളളവരെല്ലാം  ഇക്കാര്യത്തില്‍ ഒറ്റക്കെട്ടാകേണ്ടതുണ്ടെന്നും ജില്ലാ കലക്ടര്‍ കെ ജീവന്‍ ബാബു പറഞ്ഞു.
    വികലാംഗ ക്ഷേമ സഹകരണ സംഘം പ്രസിഡന്റ് ഇ വിജയന്‍, എന്‍ഡോസള്‍ഫാന്‍ ദുരിതാശ്വാസ സമിതി പ്രതിനിധി സുഭാഷ് ചീമേനി, കഥാകൃത്ത് അംബികാസുതന്‍ മാങ്ങാട്, ചാന്ദ്‌നി, കെ.കെ അശോകന്‍ തുടങ്ങിയവര്‍ സംസാരിച്ചു. എന്‍ഡോസള്‍ഫാന്‍ ദുരിതബാധിതരുടെ ദുരിതങ്ങള്‍ക്ക് അറുതി വരുത്താന്‍ പ്രത്യേക വകുപ്പു തന്നെ വേണമെന്നും അഭിപ്രായമുണ്ടായി.  
ബഡ്‌സ് സ്‌കൂളുകളുടെ  പ്രവര്‍ത്തനം മെച്ചപ്പെടുത്താനുളള നടപടികളും ചര്‍ച്ചയായി.     കമ്മിഷന്‍ ചെയര്‍പേഴ്‌സണ്‍ ശോഭാകോശിയുടെ നേതൃത്വത്തില്‍ നടന്ന സിറ്റിങില്‍ കമ്മിഷന്‍ അംഗങ്ങളായ നസീര്‍ ചാലിയം, അഡ്വ.ജെ സന്ധ്യ, ഡെപ്യൂട്ടി കലക്ടര്‍മാര്‍ തുടങ്ങിയവര്‍ സംബന്ധിച്ചു.
ദുരിതബാധിത പ്രദേശങ്ങളിലെ കുട്ടികള്‍ക്കു പരിശീലനം നല്‍കുന്ന ബഡ്‌സ് സ്‌കൂളുകളില്‍ കമ്മിഷന്‍ സന്ദര്‍ശനം നടത്തി. ചെയര്‍പേഴ്‌സണ്‍ ശോഭാകോശിയോടൊപ്പം അംഗങ്ങളായ കെ നസീര്‍, ജെ സന്ധ്യ, പി.ആര്‍.ഒ വി.പി പ്രമോദ് കുമാര്‍, ജില്ലാ ശിശുസംരക്ഷണ ഓഫിസര്‍ പി ബിജു എന്നിവരും സംബന്ധിച്ചു.