സ്വർണവില മെല്ലെ മെല്ലെ ഉയരുന്നു; ഇന്ന് കൂടിയത് 200 രൂപ

കൊച്ചി: സംസ്ഥാനത്ത് സ്വര്‍ണവിലയിൽ ഇന്ന് വർധനവ് രേഖപ്പെടുത്തി. ഒരു ഗ്രാം സ്വർണത്തിന് 25 രൂപയാണ് ഇന്ന് വർധിച്ചത്. ഇതോടെ പവന് 200 രൂപ വര്‍ധിച്ച് ഒരു പവന്‍ സ്വര്‍ണത്തിന്റെ വില 45,960 രൂപയായി. 5745 രൂപയാണ് ഒരു ഗ്രാം സ്വര്‍ണത്തിന്റെ വില.

ഈ മാസത്തിന്റെ തുടക്കത്തില്‍ 46,520 രൂപയായിരുന്നു സ്വര്‍ണവില. രണ്ടിന് 46,640 രൂപയായി ഉയര്‍ന്ന് ഈ മാസത്തെ ഏറ്റവും ഉയര്‍ന്ന നിലവാരത്തില്‍ എത്തി. പിന്നീട് സ്വര്‍ണവില തുടർച്ചയായി കുറയുകയായിരുന്നു. ഫെബ്രുവരി 15ന് 45,520 രൂപയായി താഴ്ന്ന് ഈ മാസത്തെ ഏറ്റവും താഴ്ന്ന നിലവാരത്തിലേക്കും സ്വര്‍ണവില ഇടിഞ്ഞു.

അതിനുശേഷമുള്ള ദിവസങ്ങളിൽ സ്വർണവില വീണ്ടും ഉയരുകയായിരുന്നു. ഫെബ്രുവരി 16 ന് ഗ്രാമിന് 20 രൂപയും 17 ന് 10 രൂപയും വർധിച്ചു. അന്താരാഷ്ട്ര വിപണിയിലെ വില വര്‍ധനയാണ് കേരളത്തിലെ വിലയെയും സ്വാധീനിച്ചത്.