ബേലൂർ മഖ്‌ന മരക്കടവിലെ ജനവാസ മേഖലയിലെത്തി; കർണാടക ഭാഗത്തേക്ക് തുരത്തി ഫോറസ്റ്റ് ഉദ്യോഗസ്ഥർ

പുൽപ്പള്ളി: ആളെക്കൊല്ലി ആനയായ ബേലൂർ മഖ്‌നയെ കർണാടക ഭാഗത്തേക്ക് വീണ്ടും കയറ്റി. ഇന്ന് രവിലെ ആറു മണിയോട് അടുത്ത് മരക്കടവിലെ ജനവാസ കേന്ദ്രത്തിലെത്തിയ ആനയെ വനപാലകർ കബനി പുഴയുടെ മറുകരയായ മച്ചൂരിലേക്ക് തുരത്തുകയായിരുന്നു. ആളുകൾ ജാഗ്രത പാലിക്കണമെന്ന് മുന്നറിയിപ്പ് നൽകി.

കർണാടക വനത്തിൽ നിന്നും ആന കബനി നദി കടന്ന് മുള്ളൻകൊല്ലി പഞ്ചായത്തിലെ മരക്കടവിലെത്തിയത് ഇന്ന് പുലർച്ചെയാണ്. മരക്കടവ് പത്തേക്കർ ജോസിൻ്റെ തെങ്ങിൽ തോട്ടത്തിലും മരക്കടവ് പള്ളി തോട്ടത്തിലും എത്തിയ ആനയെയാണ് വനപാലകർ മറുകരയായ മച്ചൂരിലേക്ക് തുരത്തിയത്. വനപാലക സംഘം സ്ഥലത്ത് ആനയെ നിരീക്ഷിക്കുകയാണ്. ആളുകൾ പുറത്തിറങ്ങാതെ ജാഗ്രത പാലിക്കണമെന്ന് മുന്നറിയിപ്പ് നൽകിയിട്ടുണ്ട്.

അതേസമയം, വന്യജീവി ആക്രമണം ശക്തമായ വയനാട്ടിൽ ഇന്ന് മന്ത്രിമാരുടെ നേതൃത്വത്തിൽ സർവകക്ഷി യോഗം ചേരും. വയനാട്ടിലെ വന്യമൃഗ ആക്രമണവും പ്രശ്നങ്ങളും ചർച്ചചെയ്യാനാണ് യോഗം വിളിച്ചിരിക്കുന്നത്. വനംമന്ത്രി എ.കെ.ശശീന്ദ്രൻ, മന്ത്രിമാരായ എം.ബി.രാജേഷ്, കെ.രാജൻ എന്നിവരുടെ നേതൃത്വത്തിൽ രാവിലെ പത്തിനാണു യോഗം. യോഗത്തിനു പിന്നാലെ വന്യജീവി ആക്രമണത്തിൽ കൊല്ലപ്പെട്ടവരുടെ വീടുകളും വനംമന്ത്രി സന്ദർശിക്കും.

വന്യജീവി ആക്രമണത്തിനിരയായവരുടെ ആശ്രിതർക്ക് നൽകാനുള്ള നഷ്ടപരിഹാര കുടിശിക വിതരണം ചെയ്യുന്നത് സംബന്ധിച്ച് യോഗത്തിൽ പ്രഖ്യാപനമുണ്ടായേക്കും. സർക്കാരിന്റെ വീഴ്ച ആരോപിച്ച് യു‍ഡിഎഫ് യോഗത്തിൽ പ്രതിഷേധം അറിയിക്കും. യോഗത്തിൽ പങ്കെടുക്കില്ലെന്നാണ് ബിജെപി നിലപാട്.