ഡല്‍ഹിയിലെ സീറ്റുവിഭജനത്തില്‍ ധാരണയായി; എ.എ.പി സഖ്യം പ്രധാനം; പരമാവധി വിട്ടുവീഴ്ച്ച ചെയ്യാന്‍ കോണ്‍ഗ്രസ്

ന്യൂഡല്‍ഹി: ഉത്തര്‍പ്രദേശിന് പിന്നാലെ ഡല്‍ഹിയും സീറ്റ് വിഭജനം വിജയകരമായി പൂര്‍ത്തിയാക്കി ഇന്ത്യ മുന്നണി. ആകെയുള്ള ഏഴ് സീറ്റില്‍ നാലിടത്ത് എ.എ.പിയും മൂന്നിടത്ത് കോണ്‍ഗ്രസും മത്സരിക്കുമെന്നാണ് സൂചന.

ഏഴില്‍ നാല് സീറ്റെങ്കിലും വേണമെന്നായിരുന്നു തുടക്കത്തില്‍ നിലപാട്. എന്നാല്‍ പിന്നീട് പരമാവധി വിട്ടുവീഴ്ചക്ക് കോണ്‍ഗ്രസ് നേതൃത്വം തയ്യാറായി.

ഡല്‍ഹിക്ക് പുറമെ ഹരിയാനയിലും ഗുജറാത്തിലും കോണ്‍ഗ്രസ്-ആപ് സഖ്യം നിലവില്‍ വന്നേക്കും. എന്നാല്‍ പഞ്ചാബില്‍ ഇരു പാര്‍ട്ടികളും തമ്മില്‍ കടുംപിടുത്തം തുടരുന്നുണ്ട്. ഇവിടെ 13 സീറ്റില്‍ എ.എ.പി മത്സരിക്കുമെന്ന് അരവിന്ദ് കെജ് രിവാള്‍ അറിയിച്ചിരുന്നു.

ഉത്തര്‍പ്രദേശില്‍ സമാജ് വാദി പാര്‍ട്ടിയുമായുള്ള സീറ്റ് വിഭജനത്തില്‍ പ്രിയങ്ക ഗാന്ധിയുടെ ഇടപെടലാണ് സഹായമായത്. ഇതോടെ സീറ്റ് വിഭജന നടപടികള്‍ വേഗത്തിലാക്കി. 63 സീറ്റ് എസ് പിക്കും 17 സീറ്റ് കോണ്‍ഗ്രസിനുമെന്നാണ് ഇപ്പോഴത്തെ ധാരണ. ബി.എസ്.പിയില്‍ നിന്ന് പുറത്ത് വന്ന ഡാനിഷ് അലി കോണ്‍ഗ്രസ് ടിക്കറ്റില്‍ മത്സരിക്കും. 63 സീറ്റുകളില്‍ ചിലത് സമാജ് വാദ് പാര്‍ട്ടി ചെറു കക്ഷികള്‍ക്ക് വിട്ടുകൊടുക്കാനും സാധ്യതയുണ്ട്.