ഒന്നേമുക്കാൽ മണിക്കൂർ കൊണ്ട് മുംബൈയിലെത്താം; എയര്‍ ഇന്ത്യ എക്‌സ്പ്രസിന്റെ കോഴിക്കോട് - മുംബൈ പ്രതിദിന സർവിസ് ഇന്ന് മുതൽ

കോഴിക്കോട്: കോഴിക്കോട് നിന്നു മുംബൈയിലേക്ക് എയര്‍ ഇന്ത്യ എക്‌സ്പ്രസ് പ്രതിദിന വിമാന സര്‍വിസ് ഇന്ന് തുടങ്ങും. കോഴിക്കോട് - മുംബൈ, മുംബൈ - കോഴിക്കോട് നേരിട്ടുള്ള സർവിസ് ആണ് എയര്‍ ഇന്ത്യ എക്‌സ്പ്രസ് ആരംഭിക്കുന്നത്. ഒരു മണിക്കൂർ 40 മിനിട്ട് ആണ് യാത്ര സമയം. നിലവിൽ ഈ റൂട്ടിലെ ഏറ്റവും കുറഞ്ഞ സമയത്തിലാണ് എയര്‍ ഇന്ത്യ എക്‌സ്പ്രസ് സർവിസ് നടത്തുക.

കോഴിക്കോട്ടു നിന്നു പുലര്‍ച്ചെ 1.10 നാണ് മുബൈയിലേക്ക് വിമാനം പുറപ്പെടുക. ഈ വിമാനം പുലർച്ചെ 2.50 ന് മുംബൈയിൽ എത്തും. നോൺ സ്റ്റോപ്പ് സർവിസ് ആയതിനാൽ ഏറ്റവും കുറവ് സമയമാണ് എയര്‍ ഇന്ത്യ എക്‌സ്പ്രസ് എടുക്കുന്നത്. മുബൈയിൽ നിന്ന് മറ്റു രാജ്യങ്ങളിലേക്ക് കണക്ഷൻ വിമാനങ്ങൾ പിടിക്കുന്നവർക്ക് അനുയോജ്യമായ രീതിയിലാണ് സമയം ക്രമീകരിച്ചിരിക്കുന്നത്. മുംബൈയിൽ നിന്ന് രാത്രി 10.50 നാണ് വിമാനം പുറപ്പെടുക. 12.40 ന് കോഴിക്കോട് എത്തും.

എയര്‍ ഇന്ത്യ എക്‌സ്പ്രസ് ഏറ്റവും കൂടുതൽ അന്താരാഷ്ട്ര സർവിസുകൾ നടത്തുന്നത് കരിപ്പൂർ വിമാനത്താവളത്തിൽ നിന്നാണ്. നിലവില്‍ കോഴിക്കോട്ടു നിന്നു ആഴ്ചയില്‍ 101 അന്താരാഷ്ട്ര വിമാന സര്‍വിസുക ളാണ് എയര്‍ ഇന്ത്യ എക്‌സ്പ്രസ് നടത്തുന്നത്.