ലോക്‌സഭ സ്പീക്കറും മഹാരാഷ്ട്ര മുഖ്യമന്ത്രിയുമായിരുന്ന മനോഹര്‍ ജോഷി അന്തരിച്ചു

മുംബൈ: ലോക്‌സഭ മുന്‍ സ്പീക്കറും മഹാരാഷ്ട്ര മുഖ്യമന്ത്രിയുമായിരുന്ന മനോഹര്‍ ജോഷി അന്തരിച്ചു. 86 വയസായിരുന്നു. ഹൃദയാഘാതത്തെ തുടര്‍ന്ന് മുംബൈയിലെ ആശുപത്രിയിലായിരുന്നു അന്ത്യം. ബുധനാഴ്ച്ചയാണ് ഇദ്ദേഹത്തെ മുംബൈയിലെ ആശുപത്രിയില്‍ പ്രവേശിപ്പിച്ചത്. സംസ്‌കാരം ശിവജി പാര്‍ക്കില്‍ വെള്ളിയാഴ്ച്ച വൈകുന്നേരം നടക്കും.

1995 മുതല്‍ 1999 വരെ മഹാരാഷ്ട്ര മുഖ്യമന്ത്രിയായിരുന്നു. ശിവസേനയില്‍നിന്ന് മുഖ്യമന്ത്രി സ്ഥാനത്തെത്തുന്ന ആദ്യത്തെ നേതാവായിരുന്നു മനോഹര്‍ ജോഷി. 1999 ല്‍ ശിവസേന ടിക്കറ്റില്‍ മുംബൈ നോര്‍ത്ത് സെന്‍ട്രല്‍ ലോക്‌സഭ മണ്ഡലത്തില്‍ നിന്ന് മത്സരിച്ച് എം.പിയായി. 2002-2004 കാലത്ത് ലോക്‌സഭ സ്പീക്കറായും സേവനമനുഷ്ഠിച്ചിട്ടുണ്ട്.

1937 ഡിസംബര്‍ രണ്ടിന് റായ്ഗാദിലെ നാന്തിയിലായിരുന്നു ജനനം. വിദ്യാഭ്യാസം പൂര്‍ത്തിയാക്കിയ ശേഷം അധ്യാപകനായി സേവനമനുഷ്ഠിച്ചു. 1967ലാണ് രാഷ്ട്രീയത്തില്‍ പ്രവേശിക്കുന്നത്.