ട്രെയിന്‍ വരാന്‍ മിനിറ്റുകള്‍; പാളത്തിലേക്ക് ലോറി മറിഞ്ഞ് ഡ്രൈവര്‍ മരിച്ചു; വന്‍ ദുരന്തം ഒഴിവായത് ദമ്പതികളുടെ സമയോചിത ഇടപെടലില്‍

കൊല്ലം: കേരള-തമിഴ്‌നാട് സംസ്ഥാന അതിര്‍ത്തിയായ കോട്ടവാസല്‍ എസ് വളവിന് സമീപം ചരക്ക് ലോറി റെയില്‍വേ ട്രാക്കിലേക്ക് മറിഞ്ഞ് ഡ്രൈവര്‍ മരിച്ചു. ലോറി ഡ്രൈവര്‍ തമിഴ്‌നാട് മുക്കൂടല്‍ സ്വദേശി മണികണ്ഠന്‍ (34) ആണ് മരിച്ചത്. മറിയുന്നതിനിടെ പുറത്തേയ്ക്ക് ചാടിയതിനാല്‍ സഹായിയായ പെരുമാള്‍ രക്ഷപ്പെട്ടു. ഇയാളെ പരുക്കുകളോടെ ആശുപത്രിയില്‍ പ്രവേശിപ്പിച്ചു.

നിയന്ത്രണം നഷ്ടമായ ലോറി കൊല്ലം- തിരുമംഗലം ദേശീയപാതയില്‍ നിന്നും 50 അടി താഴ്ചയില്‍ റെയില്‍വേ ട്രാക്കിലേക്ക് പതിക്കുകയായിരുന്നു. ഞായറാഴ്ച പുലര്‍ച്ചെ 12.30ഓടെയായിരുന്നു അപകടം. കേരളത്തില്‍ നിന്ന് തമിഴ്‌നാട്ടിലെ തൂത്തുക്കുടിയിലേക്ക് പ്ലൈവുഡ് ലോഡുമായി പോവുകയായിരുന്ന ലോറിയാണ് അപകടത്തില്‍പ്പെട്ടത്.

സമീപവാസികളായ ദമ്പതികളുടെ അവസരോചിതമായ ഇടപെടല്‍ മൂലം വന്‍ ട്രെയിന്‍ അപകടം ഒഴിവായി. ലോറി മറിഞ്ഞതിന് തൊട്ടുപിന്നാലെ തിരുനെല്‍വേലി പാലക്കാട് പാലരുവി എക്‌സ്പ്രസ് കടന്നു വരുകയായിരുന്നു.ലോറി മറിയുന്ന ശബ്ദം കേട്ട് ഇതിനടുത്ത് താമസിക്കുന്ന ഷണ്‍മുഖന്‍, ഭാര്യ വടക്കുതായി എന്നിവര്‍ വീട്ടില്‍ നിന്നും ട്രാക്കിലുടെ ഇറങ്ങിയോടി ടോര്‍ച്ച് തെളിച്ച് ട്രെയിന്‍ നിര്‍ത്തുകയായിരുന്നു.

ഞായറാഴ്ച രാവിലെ 6.30ഓടെ ലോറി പൂര്‍ണമായും ട്രാക്കില്‍ നിന്നും നീക്കംചെയ്ത് റെയില്‍ ഗതാഗതം പുനഃസ്ഥാപിച്ചു.